बेस्ट पतसंस्थेच्या निवडणुकीसाठी आज मतदान, ठाकरे बंधू रिंगणात, महायुतीला फटका बसणार?

BEST Election 2025 : दी बेस्ट एम्प्लॉईज को ऑपरेटिव्ह क्रेडिट सोसायटीच्या निवडणुकीसाठी (BEST) आज सोमवार (दि. 18)रोजी मुंबईत मतदान पार पडणार आहे. या निवडणुकीसाठी शिवसेना ठाकरे गटआणि मनसे यांनी एकत्रितरित्या उत्कर्ष पॅनल उभे केले आहे. तर, महायुतीच्यावतीने सहकार समृद्धी पॅनेल रिंगणात उतरवण्यात आलं आहे. यामध्ये प्रसाद लाड यांची श्रमिक उत्कर्ष सभा, नितेश राणे यांची समर्थ बेस्ट कामगार संघटना आणि शिंदेंच्या सेनेचे किरण पावसकर यांची राष्ट्रीय कर्मचारी सेना यांचा समावेश आहे.

यासोबतच शशांक राव यांचा शशांक राव पॅनेल आणि मुंबई इलेक्ट्रिक वर्कर्स युनियनचा बेस्ट परिवर्तन पॅनेलदेखील निवडणुकीच्या रिंगणात आहेत. ही निवडणूक रंगतदार होणार आहे. कारण ऐन मतदानाच्या आदल्या दिवशी आर्थिक गुन्हे शाखेची या निवडणुकीत एन्ट्री झाल्याची चर्चा आहे. या निवडणुकीत महायुतीच्यावतीने मागील अनेक वर्षे पतसंस्थेवर सत्ता असणाऱ्या उद्धव ठाकरेंच्या शिवसेनेवर भ्रष्टाचाराचा आरोप करण्यात आला आहे. आज मतदान पार पडल्यानंतर मंगळवारी 19 तारखेला मतमोजणी होणार आहे.

..ते ब्रँड ब्रँड करत असले तरी तो ब्रँड आम्ही संपवणार; भाजप नेते प्रसाद लाड यांचा ठाकरेंवर वार

ही निवडणूक गेल्या चार वर्षांपासून रखडली होती. या निवडणुकीत ठाकरे बंधूंनी युती केल्यामुळे या निवडणुकीविषयीची उत्सुकता वाढली आहे. मुंबई महानगरपालिका निवडणुकीपूर्वीची लिटमस टेस्ट म्हणून या निवडणुकीकडे पाहिले जात आहे. ठाकरे बंधूंच्या उत्कर्ष पॅनेलमध्ये 21 पैकी 19 जागा ठाकरे गट आणि दोन जागा मनसेकडून लढवण्यात येतील. निवडणुकीच्या काही दिवस आधी शिंदे गटाच्या माझगाव येथील कर्मचारी बबिता पवार यांनी ठाकरे बंधूंच्या पॅनेलमध्ये प्रवेश केला होता. ही निवडणूक ठाकरे बंधूंनी जिंकल्यास आगामी मुंबई महानगरपालिका निवडणुकीच्यादृष्टीने ठाकरे गट आणि मनसेच्या कार्यकर्त्यांमध्ये सकारात्मक संदेश जाईल.

बेस्ट क्रेडिट सोसायटी निवडणुकीच्या मतदानाला 24 तास शिल्लक असतानाच आर्थिक गुन्हे शाखेकडून (EOW) 21 संचालकांना चौकशीसाठी नोटीस पाठवण्यात आल्याने वाद निर्माण झाला. बेस्ट पतसंस्थेच्या निवडणुकीत 24 कोटी रुपयांचा भ्रष्टाचार झाल्याचा आरोप भाजप आमदार प्रसाद लाड यांनी केला होता. त्यांनी याप्रकरणी चौकशीची मागणी केली होती. पतसंस्थेचे शिवसेनेचे अध्यक्ष उमेश सारंग आणि बेस्ट कामगार सेनेचे अध्यक्ष सुहास सामंत यांची चौकशी झाली पाहिजे, असा लाड यांचा आग्रह होता. मात्र, मतदानाला अवघे काही तास शिल्लक असताना संचालकांना नोटीस धाडण्यात आल्याने वाद निर्माण होण्याची शक्यता आहे.