नागपुरातील धंतोलीतून एकाच कुटुंबातील पाच सदस्य बेपत्ता; शेवटचे लोकेशन पुण्यात, पोलिसांचा शोध सुरू

नागपूरमधील एकाच कुटुंबातील पाच सदस्य गेल्या दहा दिवसांहून अधिक काळापासून बेपत्ता असून, या घटनेमुळे संपूर्ण परिसरात खळबळ उडाली आहे.

Five members of the same family missing : नागपूरच्या धंतोली परिसरातून एक अत्यंत धक्कादायक आणि चिंताजनक घटना समोर आली आहे. येथील एकाच कुटुंबातील पाच सदस्य गेल्या दहा दिवसांहून अधिक काळापासून बेपत्ता असून, या घटनेमुळे संपूर्ण परिसरात खळबळ उडाली आहे. 24 जून रोजी घरातून बाहेर पडलेले हे पाचही सदस्य अद्याप परतलेले नसल्याने त्यांच्या नातेवाईकांसह स्थानिक नागरिकांमध्ये चिंतेचे वातावरण निर्माण झाले आहे. याप्रकरणी धंतोली पोलीस ठाण्यात बेपत्ता झाल्याची तक्रार दाखल करण्यात आली असून, पोलिसांनी तपासाची चक्रे वेगाने फिरवण्यास सुरुवात केली आहे.

एकाच घरातील पाच सदस्य अचानक गायब

धंतोली परिसरात 71 वर्षीय श्यामसुंदर परसवानी हे आपल्या कुटुंबासह वास्तव्यास आहेत. त्याच परिसरात त्यांचे दिवंगत भाऊ सुरेश परसवानी यांच्या कुटुंबातील सदस्यही राहत होते. मात्र 24 जून रोजी सुरेश परसवानी यांच्या कुटुंबातील पाच सदस्य अचानक घरातून बाहेर पडले आणि त्यानंतर त्यांचा कोणताही संपर्क झालेला नाही. बेपत्ता झालेल्यांमध्ये हर्षा परसवानी (57), जितेंद्र परसवानी (42), इशिता परसवानी (40), खुशी परसवानी (21) आणि कृष्णा परसवानी (12) यांचा समावेश आहे. कुटुंबातील सर्व सदस्य एकाच वेळी बेपत्ता झाल्यामुळे या घटनेचं गूढ अधिकच वाढलं आहे.

आर्थिक अडचणींमुळे टोकाचा निर्णय?

प्राथमिक माहितीनुसार, कुटुंबातील एका सदस्यावर मोठ्या प्रमाणात कर्ज असल्याची चर्चा समोर येत आहे. गेल्या काही महिन्यांपासून आर्थिक अडचणी आणि त्यातून निर्माण झालेला मानसिक ताण यामुळे कुटुंब त्रस्त असल्याचं सांगितलं जात आहे. या परिस्थितीमुळेच त्यांनी घर सोडण्याचा निर्णय घेतला असावा, असा प्राथमिक अंदाज व्यक्त केला जात आहे. मात्र, पोलिसांनी अद्याप याबाबत कोणताही अधिकृत निष्कर्ष जाहीर केलेला नाही. कुटुंब अचानक बेपत्ता झाल्यानंतर नातेवाईकांनी सर्व ओळखीच्या व्यक्ती, मित्रमंडळी आणि इतर संभाव्य ठिकाणी चौकशी केली. मात्र अनेक दिवस शोध घेऊनही त्यांच्याबाबत कोणतीही माहिती मिळाली नाही. अखेर श्यामसुंदर परसवानी यांनी धंतोली पोलीस ठाण्यात तक्रार दाखल केली.

येवला पालिकेत शिवसेना शिंदे गटाचे 10 पैकी 7 नगरसेवक भुजबळांच्या गोटात, किशोर दराडेंना मोठा धक्का

तांत्रिक तपासात मिळाला महत्त्वाचा धागा

तक्रार प्राप्त होताच धंतोली पोलिसांनी या प्रकरणाची गंभीर दखल घेत तपास सुरू केला. मोबाईल फोनचे कॉल रेकॉर्ड, लोकेशन ट्रॅकिंग आणि सायबर सेलच्या मदतीने तांत्रिक विश्लेषण करण्यात आले. या तपासादरम्यान बेपत्ता सदस्यांच्या मोबाईलचे शेवटचे लोकेशन पुणे शहरात आढळून आले. हा महत्त्वाचा धागा हाती लागल्यानंतर नागपूर पोलिसांनी तत्काळ एक विशेष पथक पुण्याकडे रवाना केले आहे. पुणे पोलिसांच्या सहकार्याने विविध ठिकाणी शोधमोहीम राबवली जात असून सीसीटीव्ही फुटेज, प्रवासाची माहिती आणि इतर तांत्रिक पुरावे तपासले जात आहेत.

परिसरात चिंतेचे वातावरण

एकाच कुटुंबातील पाच सदस्य अचानक बेपत्ता झाल्यामुळे धंतोली परिसरात भीती आणि संभ्रमाचं वातावरण निर्माण झालं आहे. विशेष म्हणजे या कुटुंबात १२ वर्षांच्या अल्पवयीन मुलाचाही समावेश असल्याने प्रकरणाचं गांभीर्य आणखी वाढलं आहे. नागरिकांकडूनही या कुटुंबाचा लवकरात लवकर शोध लागावा अशी अपेक्षा व्यक्त केली जात आहे. दरम्यान, पोलिसांनी नागरिकांना अफवांवर विश्वास न ठेवण्याचे आवाहन केले असून तपासाच्या प्रत्येक शक्य दिशेने चौकशी सुरू असल्याचे सांगितले आहे. बेपत्ता कुटुंबाचा शोध लागेपर्यंत या प्रकरणाकडे संपूर्ण शहराचे लक्ष लागून राहणार आहे.

संबंधित बातम्या