मराठवाड्यात भाजपची डोकेदुखी वाढली; शिवसेना शिंदे गटाची बंडखोरी

छत्रपती संभाजीनगर-जालना मतदारसंघात महायुतीची डोकेदुखी चांगलीच वाढली आहे. महायुतीच्या जागावाटपात ही जागा भाजपाला सुटलेली आहे.

सध्या राज्यात स्थानिक स्वराज्य (MLC) संस्थेसाठीच्या विधानपरिषदेच्या निवडणुकीमुळे राजकीय वातावरण ढवळू निघाले आहे. आपल्या पक्षाकडून उमेदवारी न मिळाल्याने अनेक नेत्यांनी जाहीर नाराजी व्यक्त केली आहे. तर काही पक्षांमध्ये निष्ठावंतांना डावलून आयारामांना तिकीट मिळाल्यामुळे मोठी अस्वस्थता निर्माण झाली आहे. काही ठिकाणी तर पक्षादेश झुगारून अनेक नेत्यांनी आपला उमेदवारी अर्ज दाखल केला आहे.

छत्रपती संभाजीनगर-जालना मदरारसंघात महायुतीत मोठी बंडखोरी पाहायला मिळत आहे. ही जागा भाजपाला सुटलेली असताना शिवसेना पक्षातील एका बड्या नेत्याच्या मुलाने आपला उमेदवारी अर्ज दाखल केला आहे. छत्रपती संभाजीनगर-जालना मतदारसंघात महायुतीची डोकेदुखी चांगलीच वाढली आहे. महायुतीच्या जागावाटपात ही जागा भाजपाला सुटलेली आहे. ही जागा आम्हाला मिळावी, अशी शिंदे यांच्या शिवसेनेची मागणी होती. त्यासाठी उपमुख्यमंत्री एकनाथ शिंदे यांनी चांगलाच जोर लावला होता.

भाजपचं निष्ठावंतांनो अजून वाट पहा हे सूत्र कायम; मराठवाड्यात सर्व आयात उमेदवार, जातीय समिकरणावर जोर

या राजकीय समिकरणात ही जागा भाजपाच्या वाट्याला गेली आहे. त्यामुळे संभाजीनगर आणि जालना जिल्ह्यातील शिवसेनेच्या नेत्यांमध्ये काहीशी नाराजी आहे. आता एकीकडे आम्ही महायुतीत एकदिलाने लढू असे सांगितलं जात आहे. परंतु शिवसेना पक्षाचे आमदार तथा माजी मंत्री अब्दुल सत्तार यांचे पुत्र समीर सत्तार यांनी आपला उमेदवारी अर्ज दाखल केला आहे. त्यामुळे आता सत्तार आणि सत्तार यांच्या मुलाने बंडखोरी केली का? असं विचारलं जात आहे.

ठाकरे गटाकडून डोणगावकर मैदानात

समीर सत्तार या जागेसाठी अगोदरपासूनच आग्रही होते. भाजपाने या ठिकाणी सुहास शिरसाट यांना तिकीट दिले आहे. त्यामुळे समीर सत्तार यांनी आपल्याच मित्रपक्षातील उमेदवाराला एका प्रकारे आव्हान निर्माण केले आहे. दुसरीकडे महाविकास आघाडीत ही जागा ठाकरे यांच्या शिवसेनेला मिळाली आहे. ठाकरेंच्या शिवसेनेने येथे संभाजीनगरच्या माजी जिल्हापरिषद अध्यक्षा देवयानी कृष्णा पाटील डोणगावकर यांना उमेदवारी जाहीर केली आहे. त्यामुळे छत्रपती संभाजीनगरात नेमकं काय होणार? हे पाहणं महत्त्वाचं ठरणार आहे.

संबंधित बातम्या