३ लाख २३ हजार मतदार… SIR नंतर ७१ हजार मतं कमी; संजय गायकवाडांचा मोठा दावा

Sanjay Gaikwad On SIR मी सत्ताधारी पक्षाचा एकटा असा आमदार होतो, जो माझ्या विधानसभा मतदारसंघात सुमारे ५० हजार बोगस मतदार असल्याचे सांगत होतो.

Sanjay Gaikwad Response On SIR : मतदार यादीतील कथित बोगस आणि दुबार नावांच्या मुद्द्यावरून सध्या राजकीय आरोप-प्रत्यारोप सुरू असताना शिवसेनेचे बुलढाणा मतदारसंघातील आमदार संजय गायकवाड यांनी विशेष सखोल पुनरिक्षण अर्थात SIR प्रक्रियेचे समर्थन केले आहे. त्यांच्या मतदारसंघात SIR पूर्वी मोठ्या संख्येने बोगस व दुबार मतदार असल्याचा दावा त्यांनी केला. तसेच SIR प्रक्रियेमुळे त्यांच्या मतदारसंघातील मतदारसंख्या तब्बल ७१ हजारांनी कमी झाल्याचे त्यांनी म्हटले आहे. मात्र, ही आकडेवारी आणि त्यातील नावे नेमकी कोणत्या कारणांमुळे वगळली गेली, याची स्वतंत्र अधिकृत पडताळणी आवश्यक आहे.

संजय गायकवाड यांनी निवडणूक आयुक्त ज्ञानेश कुमार यांच्या कामाचे समर्थन करत SIR प्रक्रियेवरून राजकारण करू नये, असे मत व्यक्त केले. निवडणूक विभागाकडून बूथ लेव्हल अधिकारी अर्थात BLO यांच्या माध्यमातून मतदारांच्या घरोघरी जाऊन पडताळणी केली जात असल्याने मतदार यादी अधिक अचूक होण्यास मदत होत असल्याचे त्यांनी सांगितले. महाराष्ट्रातील SIR प्रक्रियेत BLO स्तरावर प्रत्यक्ष पडताळणी आणि मतदारांच्या घरी जाऊन प्रक्रिया राबवली जात असल्याची अधिकृत उदाहरणेही उपलब्ध आहेत.

‘पूर्वीच सांगितलं होतं, माझ्या मतदारसंघात ५० हजार बोगस मतदार’

नगरपरिषद आणि विधानसभा निवडणुकांच्या काळात विरोधकांकडून भाजप आणि मित्रपक्षांवर ‘बोगस मतांच्या जोरावर निवडून येत आहेत’ असे आरोप करण्यात येत होते, असा संदर्भ देत गायकवाड यांनी आपली भूमिका मांडली. त्यावेळी मी सत्ताधारी पक्षाचा एकटा असा आमदार होतो, जो माझ्या विधानसभा मतदारसंघात सुमारे ५० हजार बोगस मतदार असल्याचे सांगत होतो. अनेक नावे डबल आणि बोगस आहेत. त्यामुळे त्याचा फटका मला बसला आहे,” असा दावा गायकवाड यांनी केला.

३ लाख २३ हजार मतदारांपैकी २३ हजार बोगस

SIR प्रक्रिया सुरू होण्यापूर्वी त्यांच्या मतदारसंघात ३ लाख २३ हजार मतदार असल्याचे सांगताना त्यापैकी २३ हजार मतदार बोगस असल्याचे आढळून आले, असा दावा गायकवाड यांनी केला. त्यानंतर SIR प्रक्रियेमुळे त्यांच्या मतदारसंघातील मतदारसंख्या सुमारे ७१ हजारांनी घटल्याचे त्यांनी म्हटले. मात्र, या ७१ हजार नावांपैकी किती नावे दुबार, मृत, स्थलांतरित किंवा इतर कारणांमुळे वगळण्यात आली, याचा तपशील अधिकृत निवडणूक विभागाच्या आकडेवारीतून स्पष्ट होणे महत्त्वाचे आहे.

‘ज्ञानेश कुमारांचं काम योग्य’

SIR वरून विरोधकांकडून मुख्य निवडणूक आयुक्त ज्ञानेश कुमार यांच्या राजीनाम्याची मागणी केली जात असताना गायकवाड यांनी त्यांचे समर्थन केले. ज्ञानेश कुमार यांचं काम बरोबर आहे. त्यांनी बोगस नावं कमी केली आहेत. प्रत्येकाच्या घरी जाऊन BLO पडताळणी करत आहेत. त्यामुळे आता खरी मतदार यादी बनत आहे. उगाच यात राजकारण करू नये, अशी भूमिका त्यांनी मांडली.

रोहित पवारांवरही गायकवाडांचा निशाणा

SIR च्या मुद्द्यावरून बोलताना गायकवाड यांनी राष्ट्रवादी काँग्रेसचे आमदार रोहित पवार यांच्यावरही टीका केली. रोहित पवारांनी आमदारकीचा राजीनामा द्यावा आणि IAS किंवा IPSची परीक्षा द्यावी. IPS बनावं आणि स्वतः चौकशी करावी, असा खोचक टोला त्यांनी लगावला. दोन्ही शिवसेना एकत्र याव्यात, अशी भावना आपल्या पक्षातील काही कार्यकर्त्यांमध्ये असल्याचे सांगतानाच दोन्ही शिवसेना सध्या एकत्र येऊ शकत नसल्याचेही त्यांनी म्हटले.

संबंधित बातम्या