धक्कादायक! डिजिटल अरेस्टच्या सायबर क्राइम रॅकेटमध्ये सापडली छत्रपती संभाजीनगरची दोन मुलं

Digital Arrest In Chhatrapati Sambhajinagar : देशभरात चर्चेत असेल्या डिजिटल (Arrest) अरेस्ट या सायबर क्राइमच्या राष्ट्रीय रॅकेटमध्ये छत्रपती संभाजीनगर शहरातील दोन मुलं सहभागी असल्याची धक्कादायक बातमी तामिळनाडू पोलिसांच्या तपासात उघड झाली आहे. श्रीकांत सुरेशराव गाडेकर (३४, रा. वडगाव कोल्हाटी, छत्रपती संभाजीनगर), नरेश कल्याणराव शिंदे (२६, रा. आर्यन सिटी, तिसगाव चौफुली, वाळूज) अशी त्यांची नावं आहेत.

हे दोघेही अभियंते असून गेल्या अनेक दिवसांपासून ते दिवसभर देवळाई परिसरात हॉटेलमध्ये खोली बुक करून ऑनलाइन फसवणुकीचे टार्गेट पूर्ण करत होते असं समोर आलं आहे. तामिळनाडूतील चेन्नईच्या, तिरूवनचेरीत राहणाऱ्या प्रभाकरन कुंधू चंद्रन रुवी यांना दिल्ली सायबर पोलीस असल्याचं भासवून कॉल करण्यात आला होता. बँक खात्यात मनी लॉन्ड्रिंगद्वारे मोठा आर्थिक गैरव्यवहार झाल्याचे सांगून त्यांना डिजिटल अरेस्टमध्ये अडकवले. त्यांच्याकडून तब्बल दोन कोटी २७ लाख २४ हजार ९०० उकळण्यात आले होते.

सावधान! भारतात सायबर फ्रॉडचं जाळं; एकाच वर्षात तब्बल 23 हजार कोटींची फसवणूक

या प्रकरणी तामिळनाडूचे तिरूवनचेरी (तांबरम शहर) पोलीस तपास करत होते. तांत्रिक तपास करत असताना तामिळनाडू पोलिसांच्या तपासाचे धागेदोरे छत्रपती संभाजीनगरपर्यंत पोहोचले. पोलीस निरीक्षक व्ही. के. सशिकुमार हे २९ जुलै रोजी पथकासह शहरात दाखल झाले. पोलीस अधीक्षक डॉ. विनयकुमार राठोड यांची भेट घेऊन त्यांनी सहकाऱ्याची विनंती केली होती. पोलीस अधीक्षक डॉ. राठोड यांच्या सूचनेवरून स्थानिक गुन्हे शाखेचे निरीक्षक विजयसिंग राजपूत, सहायक निरीक्षक पवन इंगळे, अंमलदार श्रीमंत भालेराव, अशोक वाघ, शिवानंद वनगे यांचे विशेष पथक तयार करण्यात आले.

तामिळनाडू पोलिसांकडे केवळ तांत्रिक पुरावे होते. त्यामुळे आरोपींचा माग काढणे आव्हानात्मक होतं. तपासात आरोपी देवळाई चौकातील एका हॉटेलमध्ये असल्याचं निष्पन्न झालं. तेव्हा तत्काळ पथकाने हॉटेल गाठत श्रीकांत व नरेशला ताब्यात घेतलं. तामिळनाडू सायबर पोलिसांनी त्यांना ताब्यात घेत सातारा पोलिस ठाण्यात नोंद करुन रवाना झाले. दरम्यान, देशभरात डिजिटल अरेस्टच्या नावाने अब्जावधी रुपयांची लुटमार सुरू आहे. अनेक शहरांच्या पोलिसांसह राष्ट्रीय तपास यंत्रणांनी यात आंतरराष्ट्रीय टोळ्यांचा सहभाग निष्पन्न केला आहे. मात्र, डिजिटल अरेस्टचे धागेदोरे शहरातील वडगाव कोल्हाटीच्या तरुणांपर्यंत पोहोचल्याचे कळल्यानंतर पोलीस हादरला आहे.

संबंधित बातम्या