उद्योगांचे स्थलांतर रोखण्यासाठी सरकार सक्रिय; उद्योगमंत्री उदय सामंत यांची चाकणमध्ये 16 ऑगस्टला निर्णायक बैठक

वाढती वाहतूक कोंडी आणि उद्योग क्षेत्रासमोरील पायाभूत सुविधांच्या अडचणी यावर माध्यमांमध्ये सातत्याने बातम्या प्रसिद्ध होत आहेत.

Uday Samant’s meeting in Chakan : पुणे जिल्ह्यातील चाकण औद्योगिक वसाहतीतील रस्त्यांची दुरवस्था आणि त्यातून निर्माण झालेल्या वाहतूक समस्यांबाबत राज्य सरकारने गंभीर दखल घेतली आहे. गेल्या काही दिवसांपासून चाकणमधील खराब रस्ते, वाढती वाहतूक कोंडी आणि उद्योग क्षेत्रासमोरील पायाभूत सुविधांच्या अडचणी यावर माध्यमांमध्ये सातत्याने बातम्या प्रसिद्ध होत आहेत. या समस्यांमुळे काही उद्योग महाराष्ट्राबाहेर किंवा राज्यातील इतर जिल्ह्यांमध्ये स्थलांतर करण्याचा विचार करत असल्याच्या चर्चांनाही उधाण आले आहे. त्यामुळे हजारो रोजगारांवर परिणाम होण्याची शक्यता व्यक्त केली जात आहे.

या पार्श्वभूमीवर राज्याचे उद्योगमंत्री उदय सामंत यांनी चाकणमधील औद्योगिक संघटनांच्या प्रतिनिधींशी दूरध्वनीवरून संवाद साधून परिस्थितीची माहिती घेतली. केवळ आश्वासनांपुरते न थांबता उद्योजकांच्या अडचणी प्रत्यक्ष समजून घेण्यासाठी आणि त्यावर ठोस उपाययोजना करण्यासाठी 16 ऑगस्ट रोजी सायंकाळी 4 वाजता चाकण येथे विशेष बैठक आयोजित करण्यात आली आहे. या बैठकीत उद्योगमंत्री स्वतः उपस्थित राहून उद्योजक, औद्योगिक संघटनांचे पदाधिकारी आणि संबंधित विभागांच्या अधिकाऱ्यांशी सविस्तर चर्चा करणार आहेत.

चाकण हे राज्यातील सर्वात महत्त्वाच्या औद्योगिक पट्ट्यांपैकी एक मानले जाते. वाहन उद्योग, अभियांत्रिकी, उत्पादन क्षेत्र, निर्यात उद्योग तसेच अनेक बहुराष्ट्रीय कंपन्यांनी येथे गुंतवणूक केली आहे. हजारो कोटी रुपयांची गुंतवणूक आणि लाखो रोजगार निर्माण करणारे हे औद्योगिक केंद्र महाराष्ट्राच्या अर्थव्यवस्थेसाठी अत्यंत महत्त्वाचे आहे. मात्र गेल्या काही वर्षांत रस्त्यांची खराब अवस्था, वाहतुकीवरील वाढलेला ताण, पावसाळ्यात निर्माण होणारे खड्डे आणि मालवाहतुकीतील विलंब यामुळे उद्योजकांमध्ये नाराजी वाढत असल्याचे चित्र आहे.

मोठी बातमी! टेक ऑफ करताना उदय सामंतांच्या हेलिकॉप्टरमध्ये बिघाड, पायलटच्या लक्षात आलं अन्यथा…

उद्योगमंत्री उदय सामंत यांनी स्पष्ट केले की, चाकणमधील उद्योगांना आवश्यक असलेल्या पायाभूत सुविधा उपलब्ध करून देणे आणि उद्योजकांना येणाऱ्या अडचणी दूर करणे हे राज्य सरकारचे प्राधान्य आहे. रस्ते, वाहतूक व्यवस्था, औद्योगिक क्षेत्रातील अंतर्गत संपर्क मार्ग, पाणीपुरवठा आणि इतर मूलभूत सुविधांबाबत उद्योजकांच्या समस्या प्रत्यक्ष जाणून घेतल्या जातील. त्यानंतर उद्योग विभाग, सार्वजनिक बांधकाम विभाग, महाराष्ट्र औद्योगिक विकास महामंडळ आणि इतर संबंधित यंत्रणांच्या समन्वयातून तातडीच्या आणि दीर्घकालीन उपाययोजना राबविण्यात येतील.

दरम्यान, चाकणमधील औद्योगिक संघटनांनीही उद्योगमंत्र्यांच्या पुढाकाराचे स्वागत केले असून बैठकीत सकारात्मक भूमिका घेण्याचे आश्वासन दिले आहे. उद्योगांचे स्थलांतर रोखणे, विद्यमान गुंतवणूक टिकवून ठेवणे आणि नव्या उद्योगांना आकर्षित करण्यासाठी आवश्यक पायाभूत सुविधा उभारण्याची मागणी उद्योजकांकडून सातत्याने केली जात आहे. रोजगारनिर्मिती आणि औद्योगिक वाढ कायम ठेवण्यासाठी शासन आणि उद्योग क्षेत्राने एकत्रितपणे काम करण्याची गरज असल्याचे मतही उद्योजकांनी व्यक्त केले आहे.

चाकण, तळेगावची कोंडी सोडवा; उद्योजकांच्या पत्रकार परिषदेनंतर जिल्हाधिकारी अॅक्शन मोडवर

चाकणमधून उद्योग बाहेर जाण्याची परिस्थिती निर्माण होऊ नये, तसेच राज्याच्या औद्योगिक विकासावर कोणताही परिणाम होऊ नये यासाठी सरकार कटिबद्ध असल्याचे उद्योगमंत्री उदय सामंत यांनी स्पष्ट केले. उद्योजक, स्थानिक प्रशासन आणि संबंधित विभाग यांच्यात समन्वय साधून समस्यांचे निराकरण करण्यासाठी आवश्यक ते सर्व निर्णय घेतले जातील, असेही त्यांनी सांगितले.

आगामी 16 ऑगस्ट रोजी होणाऱ्या बैठकीकडे आता उद्योग क्षेत्राचे लक्ष लागले असून, चाकणच्या पायाभूत सुविधांबाबत कोणते ठोस निर्णय होतात आणि उद्योगांच्या प्रमुख मागण्यांवर सरकार कोणती भूमिका घेते, याकडे राज्यभरातील औद्योगिक क्षेत्राचे लक्ष लागले आहे. चाकणच्या औद्योगिक विकासाला नवी गती देण्यासाठी आणि रोजगाराच्या संधी टिकवून ठेवण्यासाठी ही बैठक महत्त्वाची ठरण्याची शक्यता आहे.

संबंधित बातम्या