बंगालच्या उपसागरातील कमी दाबाचा प्रभाव; महाराष्ट्रात पुढील चार दिवस मुसळधार पावसाचा इशारा

हवामानात मोठा बदल होण्याची शक्यता असून भारतीय हवामान विभागाने पुढील चार दिवसांसाठी मुसळधार ते अतिमुसळधार पावसाचा इशारा दिला आहे.

Warning of heavy rainfall : महाराष्ट्रात गेल्या काही दिवसांपासून पावसाने तुलनेने विश्रांती घेतली असली तरी आता पुन्हा एकदा पावसाचा जोर वाढण्याची चिन्हे दिसत आहेत. बंगालच्या उपसागरावर सक्रिय झालेल्या कमी दाबाच्या क्षेत्रामुळे राज्यातील हवामानात मोठा बदल होण्याची शक्यता असून भारतीय हवामान विभागाने पुढील चार दिवसांसाठी मुसळधार ते अतिमुसळधार पावसाचा इशारा दिला आहे. विशेषतः कोकण किनारपट्टी, घाटमाथा, पूर्व विदर्भ, मराठवाडा आणि मध्य महाराष्ट्रातील काही भागांमध्ये जोरदार पावसाची शक्यता वर्तवण्यात आली आहे.

हवामान विभागाच्या माहितीनुसार, गुजरातपासून कर्नाटकपर्यंत कमी दाबाचा पट्टा तयार झाला असून त्याचा प्रभाव महाराष्ट्रावर पडत आहे. या प्रणालीमुळे वातावरणात मोठ्या प्रमाणावर आर्द्रता निर्माण होत असून राज्यातील अनेक भागांत पावसासाठी अनुकूल परिस्थिती तयार झाली आहे. त्यामुळे पुढील दोन ते चार दिवस राज्यभरात पावसाची तीव्रता वाढण्याची शक्यता आहे. विशेषतः दक्षिण कोकण, गोवा सीमावर्ती भाग आणि दक्षिण मध्य महाराष्ट्रातील घाटमाथा परिसरात मुसळधार ते अतिमुसळधार पावसाची नोंद होण्याचा अंदाज आहे. कोकणातील नद्या, धरणे आणि खोरी परिसरात सतर्कता बाळगण्याचे आवाहन प्रशासनाने केले आहे.

दरम्यान, हवामान विभागाने पुणे जिल्ह्यातील घाटमाथा भागासाठी रेड अलर्ट जारी केला आहे. रायगड, रत्नागिरी आणि सातारा जिल्ह्यांच्या घाटमाथा परिसरासाठी ऑरेंज अलर्ट देण्यात आला आहे. तसेच सिंधुदुर्ग, कोल्हापूर घाटमाथा आणि ठाणे जिल्ह्यासाठी यलो अलर्ट जारी करण्यात आला आहे. विदर्भातील सर्व जिल्ह्यांनाही यलो अलर्ट देण्यात आला असून मेघगर्जनेसह पावसाची शक्यता व्यक्त करण्यात आली आहे. उत्तर महाराष्ट्र आणि मराठवाड्यातील काही भागांमध्ये हलका ते मध्यम स्वरूपाचा पाऊस पडण्याची शक्यता असली तरी काही ठिकाणी जोरदार सरींचाही अंदाज वर्तवण्यात आला आहे. शेतकरी, प्रवासी आणि नदीकाठच्या नागरिकांनी हवामान विभागाच्या सूचनांचे पालन करण्याचे आवाहन करण्यात आले आहे.

एशियन गेम्स 2026 क्रिकेट स्पर्धेचा ड्रॉ जाहीर; भारताच्या पुरुष आणि महिला संघांना थेट क्वार्टर फायनलमध्ये प्रवेश

यावर्षी जुलै महिन्यात पावसाचे प्रमाण अपेक्षेपेक्षा कमी राहिले आहे. देशभरात जुलै महिन्यात सरासरीच्या तुलनेत सुमारे 15 टक्के कमी पावसाची नोंद झाली आहे. महाराष्ट्रात 1 जुलै ते 25 जुलै या कालावधीत सरासरीच्या तुलनेत सुमारे 3 टक्के कमी पाऊस झाला आहे. विभागनिहाय आकडेवारी पाहिली असता मराठवाड्यात सर्वाधिक तूट दिसून येत असून येथे सरासरीच्या तुलनेत 33 टक्के कमी पाऊस झाला आहे. विदर्भातही पावसाची कमतरता कायम असून सरासरीपेक्षा 26 टक्के कमी पाऊस नोंदवण्यात आला आहे. मात्र मध्य महाराष्ट्रात परिस्थिती काहीशी वेगळी असून येथे सरासरीपेक्षा 22 टक्के अधिक पाऊस झाला आहे. कोकण विभागातही सरासरीपेक्षा 4 टक्के अधिक पावसाची नोंद झाली आहे.

हवामान तज्ज्ञांच्या मते, मान्सूनच्या प्रणालीतील बदल, वातावरणातील वाढते तापमान, एल निनो-ला निना यांसारखे जागतिक हवामान घटक तसेच वाढते प्रदूषण यांचा पावसाच्या वितरणावर परिणाम होत आहे. त्यामुळे कमी कालावधीत अतिवृष्टी आणि त्यानंतर दीर्घ काळ पावसाचा खंड अशी स्थिती अनेक भागांत पाहायला मिळत आहे. आता बंगालच्या उपसागरातील कमी दाबाच्या क्षेत्रामुळे महाराष्ट्रात पुन्हा एकदा मान्सून सक्रिय होण्याची चिन्हे असून पुढील काही दिवस राज्यातील अनेक भागांमध्ये जोरदार पावसाचा तडाखा बसण्याची शक्यता हवामान विभागाने व्यक्त केली आहे. त्यामुळे नागरिकांनी सतर्क राहून प्रशासन आणि हवामान विभागाच्या सूचनांचे पालन करण्याचे आवाहन करण्यात आले आहे.

संबंधित बातम्या