‘कितीही हल्ला करा मी विचलित होणार नाही’; अर्ज भरताच सुनेत्रा पवारांची फेसबुक पोस्ट

Baramati Loksabha : लोकसभा निवडणुकीत (Loksabha Election) अवघ्या महाराष्ट्राचं बारामती लोकसभा (Baramati Loksabha) मतदारसंघाकडे लक्ष लागलं आहे. या निवडणुकीत सुप्रिया सुळे (Supriya Sule) यांची लढत अजित पवार यांच्या पत्नी सुनेत्रा पवार (Sunetra Pawar) यांच्याशी होणार आहे. सुळे आणि पवार यांनी आज अखेर आपला उमेदवारी अर्ज दाखल केला आहे. तर सुनेत्रा पवार यांनी उमेदवारी अर्ज दाखल करताच फेसबुक पोस्ट शेअर सर्वांचे आभार मानले आहेत. कितीही हल्ला केला तरी मी विचलित होणार नसल्याचा इशारा या पोस्टमधून सुनेत्रा पवार यांनी विरोधकांना दिला आहे.

‘कितीही हल्ला केला तरी मी विचलित होणार नाही. एकही शब्द आजपर्यंत वाईट बोलले नाही आणि यापुढेही बोलणार नाही’. मी विकासाचा कार्यक्रम घेऊनच जनतेसमोर गेले आणि यापुढेही जाणार असल्याचं सुनेत्रा पवार यांनी उमेदवारी अर्ज भरताच स्पष्ट केलं आहे.

फेसबुक पोस्टमध्ये काय म्हणाल्या सुनेत्रा पवार?
“जनसागराच्या प्रचंड लाटेवर स्वार होऊन पार पडलेली जाहीर सभा अभूतपूर्व अशीच म्हणावी लागेल. उमेदवारी अर्ज दाखल करण्यापूर्वी पार पडलेल्या या महासभेने मला बारामती लोकसभा मतदार संघातील महायुतीच्या विजयाचा विश्वास अधिकच भक्कम केला, बळकट केला. पुणे येथील जिल्हा परिषदेशेजारी पार पडलेल्या या जाहीर सभेस मुख्यमंत्री एकनाथ शिंदे, उपमुख्यमंत्री अजितदादा आणि देवेंद्र फडणवीस, केंद्रीय मंत्री रामदास आठवले, राष्ट्रवादीचे नेते प्रफुल्ल पटेल, ना. चंद्रकांत पाटील, विधान परिषदेच्या उपसभापती नीलम गोरे, खा. मेधा कुलकर्णी, माजी मंत्री हर्षवर्धन पाटील, माजी मंत्री विजयबापू शिवतारे, आ. भीमरावअण्णा तापकीर, आ. दत्तामामा भरणे, आ. राहुल कुल, आ. माधुरी मिसाळ, आ. महेश लांडगे, आ. दिलीप मोहिते, आ. अतुल बेनके, आ. सुनील टिंगरे, आ. चेतन तुपे, आ. सिद्धार्थ शिरोळे, आ. अश्विनी जगताप, माजी आमदार रमेशआप्पा थोरात, शरद ढमाले, अशोक टेकावडे, योगेश टिळेकर, माजी खासदार प्रदीप रावत यांच्यासह अनेक आजी, माजी आमदार महायुतीतील सर्व घटक पक्षांचे राष्ट्रीय, राज्य पदाधिकारी, जिल्हाध्यक्ष, पदाधिकारी उपस्थित होते.

बेकायदेशीरपणे अमेरिकेत प्रवेश करणाऱ्या भारतीयाचा मृत्यू; डिटेन्शन सेंटरमध्ये होता स्थानबद्ध

सर्वच वक्त्यांनी जमलेल्या अफाट जनसागराची आपल्या भाषणात दखल घेत विजयाचा विश्वास होताच तो आता गॅरंटीत परावर्तित झाल्याचे सांगितले. मला विजयी करण्याची विनंती केली. माझ्या भाषणात मी सांगितले, की माझ्या पाठीशी असलेले जनतेचे प्रेम आणि राज्य व केंद्र शासनाच्या भक्कम पाठबळावर बारामती लोकसभा मतदार संघात जनसंपर्क आणि कामाच्या बळावर विकासाच्या प्रक्रियेला गतिमान करेन.

यावेळी झालेला एक शुभशकुन म्हणजे अनेक मान्यवर महायुतीच्या पाठीशी एकवटत असताना उबाठा शिवसेनेचे नेते कुलदीप कोंडे यांनी एकनाथ शिंदे यांच्या नेतृत्वाखाली काम करण्याचा निर्णय घेत शिवसेनेत प्रवेश केला. त्यांच्या या प्रवेशाने पुणे जिल्ह्यासह विशेषतः भोर राजगड मुळशी विधानसभा मतदार संघात महायुतीच्या मताधिक्यात मोठी वाढ होणार आहे.

या शुभशकुनासोबत जनतेच्या या अफाट प्रतिसादाने पार पडलेल्या या महासभेने एक सिध्द केलं. ते म्हणजे कोणी कितीही हल्ला केला तरी मी विचलित होणार नाही. एकही शब्द आजपर्यंत वाईट बोलले नाही आणि यापुढेही बोलणार नाही. मी विकासाचा कार्यक्रम घेऊनच जनतेसमोर गेले आणि यापुढेही जाईन. कारण महायुतीपाठी एकवटलेल्या महाशक्तीने आधीचाच विजयाचा विश्वास खात्रीत परावर्तीत केला आहे. ती खात्री देणाऱ्या तमाम नेते, पदाधिकारी, कार्यकर्ते आणि जनतेचे मनापासून आभार.”

संबंधित बातम्या