अभिनेते प्रसाद ओक यांचा नवा विक्रम, एकाचवेळी दोन ग्लोबल रेकॉर्डमध्ये नाव

ही गौरवपूर्ण नोंद २०२२ साली प्रदर्शित झालेल्या गाजलेल्या मराठी चित्रपट धर्मवीरमधील त्यांच्या उल्लेखनीय अभिनयासाठी आहे.

मराठी चित्रपटसृष्टीतील दिग्गज अभिनेते प्रसाद प्रभाकर ओक (Movie) यांनी ऐतिहासिक जागतिक कामगिरी करत “इंडिया बुक ऑफ रेकॉर्ड्स” आणि ‘ग्लोबल बुक ऑफ एक्सलन्स, इंग्लंड’ कडून अधिकृत मान्यता मिळवली आहे. एका मराठी चित्रपटासाठी सर्वाधिक पुरस्कार जिंकणारे एकमात्र अभिनेते म्हणून त्यांची नोंद करण्यात आली आहे. हा प्रतिष्ठेचा विश्वविक्रम १४ जानेवारी २०२६ रोजी अधिकृतरीत्या प्रमाणित व नोंदविण्यात आला.

ही गौरवपूर्ण नोंद २०२२ साली प्रदर्शित झालेल्या गाजलेल्या मराठी चित्रपट धर्मवीरमधील त्यांच्या उल्लेखनीय अभिनयासाठी आहे. या चित्रपटासाठी प्रसाद ओक यांनी तब्बल १५ मानाचे पुरस्कार पटकावले—जे अभूतपूर्व आहे. त्यांच्या प्रभावी आणि अंतर्मुख अभिनयाने त्यांनी समीक्षकांची एकमताने दाद मिळवलीच, पण भारतीय प्रादेशिक चित्रपटसृष्टीत कलात्मक उत्कृष्टतेचा नवा मानदंडही प्रस्थापित केला.

‘नाचा दणाना’वर थिरकणार महाराष्ट्र! ‘सुपर डुपर’मधील जल्लोषमय गाणे प्रदर्शित

धर्मवीरमधून प्रसाद ओक यांनी जननेते धर्मवीर आनंद दिघे यांची भूमिका साकारली—लोकसेवेसाठी आयुष्य वेचलेले, जनमानसात देवतुल्य स्थान असलेले व्यक्तिमत्त्व. हा चित्रपट २०२२ मधील सर्वाधिक यशस्वी ब्लॉकबस्टरपैकी एक ठरला, तर त्याच्या सिक्वेलनेही या वारशाला अधिक बळकटी दिली.

या जागतिक सन्मानाबाबत बोलताना प्रसाद प्रभाकर ओक म्हणाले, “मी नि:शब्द आहे. हा अत्यंत अभिमानाचा क्षण आहे. माझ्या संपूर्ण टीमचा—लेखक, दिग्दर्शक, माझं कुटुंब, प्रेक्षक आणि मला पुरस्कार देणाऱ्या सर्व परीक्षकांचा मी मनापासून आभारी आहे. शीर्षक भूमिकेत काम करण्याची संधी मला एखाद्या चित्रपटातून तरी मिळेल, असं मी स्वप्न पाहिलं होतं. धर्मवीर हा माझा ९६वा चित्रपट होता, आणि हजारो लोकांसाठी देवतुल्य मानल्या जाणाऱ्या आनंद दिघे यांची भूमिका साकारणे ही जबाबदारी मी अत्यंत प्रामाणिकपणे पार पाडली.”

ते पुढे म्हणाले, “मी आनंद दिघे यांना वैयक्तिकरित्या कधी भेटलो नव्हतो; मात्र त्यांचे फोटो आणि त्यांच्याजवळील लोकांशी झालेल्या संवादांमधून त्यांच्या चालण्याची ढब, बोलण्याची शैली आणि हावभाव यांचे बारकाईने निरीक्षण करून मी सविस्तर नोंदी तयार केल्या. चित्रपटाला मिळालेलं प्रेम, माझ्या अभिनयाचं झालेलं कौतुक आणि आलेले असंख्य अभिनंदनाचे फोन हे सगळं अविस्मरणीय होतं. राष्ट्रीय पुरस्कार हुकल्याची थोडी खंत राहिली; पण मी प्रामाणिकपणे आणि समर्पणाने काम केलं, हीच माझी सर्वात मोठी कमाई आहे. देवाची कृपा माझ्यावर आहे.”

प्रसाद ओक यांनी ‘इंडिया बुक ऑफ रेकॉर्ड्स’ आणि ‘ग्लोबल बुक ऑफ एक्सलन्स, इंग्लंड’कडून मिळालेल्या सन्मानाबद्दल कृतज्ञता व्यक्त करत त्यांना “राष्ट्रीय पुरस्काराइतकेच मानाचे” असे संबोधले. हा जागतिक सन्मान केवळ प्रसाद प्रभाकर ओक यांच्या कारकिर्दीतील सुवर्णक्षण ठरत नाही, तर मराठी चित्रपटसृष्टीला आंतरराष्ट्रीय स्तरावर अधोरेखित करणारा ठरतो. मराठी सिनेमाची वाढती ताकद, कलात्मक खोली आणि जागतिक प्रभाव यांचा हा ठोस पुरावा आहे.

संबंधित बातम्या