कॅन्सर रुग्णांना मोठा दिलासा! 137 औषधांच्या किंमती 70 टक्क्यांपर्यंत घटणार; सरकारच्या कंपन्यांना सूचना
Cancer Medicines Price Cut 2026: 137 कॅन्सर औषधांच्या किमती 70 टक्क्यांपर्यंत कमी होणार असून, 9 नोव्हेंबर 2026 पासून सुधारित दर लागू होतील.
-
- Written By: Vishal Rohitkar Published:
Cancer Medicines Price Cut 2026: कॅन्सरच्या उपचारांसाठी मोठा खर्च करणाऱ्या रुग्णांना आणि त्यांच्या कुटुंबीयांना दिलासा मिळणार आहे. केंद्र सरकारने 137 कॅन्सरच्या औषधांच्या विक्रीवरील व्यापारी नफ्याच्या (Trade Margin) मर्यादेत कपात करण्याचा निर्णय घेतला आहे. यामुळे संबंधित कॅन्सरच्या औषधांच्या कमाल किरकोळ किमतीत (MRP) 70 टक्क्यांपर्यंत घट होण्याची अपेक्षा आहे. राष्ट्रीय औषध किंमत निर्धारण प्राधिकरणाने (NPPA) यासंदर्भात अधिसूचना जारी केली असून, सुधारित किंमती 9 नोव्हेंबर 2026 पासून लागू होणार आहेत.
गोकुळ दूध संघाच्या निवडणुकीसाठी आज मतदान; 25 जागांसाठी महायुती-मविआत चुरस, उद्या निकाल
औषधांच्या किमती कमी करण्यासाठी सरकारचा निर्णय
केंद्रीय रसायने आणि खते मंत्रालयाच्या औषधनिर्माण विभागांतर्गत कार्यरत असलेल्या NPPA ने 137 निवडक कॅन्सर औषधांच्या व्यापारातील नफ्यावर 30 टक्क्यांची मर्यादा निश्चित केली आहे. औषधांच्या वितरण आणि विक्रीदरम्यान आकारले जाणारे अतिरिक्त मार्जिन कमी करणे, कॅन्सरवरील उपचार अधिक परवडणारे करणे आणि रुग्णांना औषधे सहज उपलब्ध करून देणे, हा या निर्णयामागील उद्देश आहे.
मोठी बातमी! कोलकात्यात दुर्गापूजा मंडपात चेंगराचेंगरी, 17 जणांचा मृत्यू तर अनेकजण जखमी
ही कपात सर्व औषधांच्या किमतीत सरसकट 70 टक्के होणार नाही. औषधांची सध्याची किंमत आणि विक्रीतील मार्जिन यानुसार प्रत्येक औषधाच्या कमाल किरकोळ किमतीत घट होईल. सरकारच्या अंदाजानुसार, काही औषधांच्या किमतीत 20 ते 70 टक्क्यांपर्यंत कपात होऊ शकते.
औषध कंपन्यांना सात दिवसांत सुधारित दर जाहीर करण्याच्या सूचना
17 ऑक्टोबर 2026 रोजी जारी करण्यात आलेल्या अधिसूचनेनुसार, संबंधित औषध उत्पादक कंपन्यांना सात दिवसांच्या आत सुधारित किमती NPPA ला कळवाव्या लागणार आहेत. तसेच, औषधांच्या सुधारित किमतींच्या याद्या कंपन्यांच्या वेबसाइटवर प्रसिद्ध करणे आणि वितरक, औषध विक्रेते व रुग्णालयांपर्यंत पोहोचवणे बंधनकारक असेल.
9 नोव्हेंबरपासून औषध विक्रेत्यांना आणि रुग्णालयांना सुधारित दरानेच औषधांची विक्री करावी लागेल. रुग्णालयांनाही औषधांच्या सुधारित किमतींची यादी आपल्या वेबसाइटवर प्रसिद्ध करावी लागणार आहे.
औषधांचा तुटवडा होऊ नये, यासाठीही खबरदारी
औषधांच्या किमती कमी करताना बाजारात औषधांचा तुटवडा निर्माण होऊ नये, यासाठी सरकारने औषध कंपन्यांना सध्याचे उत्पादन आणि पुरवठ्याची पातळी कायम ठेवण्याचे निर्देश दिले आहेत. उत्पादन कमी करायचे असल्यास कंपन्यांना NPPA ची पूर्वपरवानगी घ्यावी लागेल. संबंधित औषधांचे उत्पादन बंद करण्याचा निर्णय घेतल्यास त्याची माहितीही प्राधिकरणाला द्यावी लागेल.
नियमांचे पालन न करणाऱ्या कंपन्यांकडून अतिरिक्त आकारलेली रक्कम व्याजासह वसूल केली जाऊ शकते. या निर्णयाच्या अंमलबजावणीवर राज्यांचे औषध नियंत्रक लक्ष ठेवणार आहेत.
रुग्णांना किती आर्थिक दिलासा मिळणार?
कॅन्सरच्या उपचारांमध्ये औषधांचा खर्च मोठा असतो. त्यामुळे औषधांच्या किमती कमी झाल्यास रुग्णांच्या कुटुंबांवरील आर्थिक भार कमी होण्यास मदत होऊ शकते. NPPA च्या बैठकीतील अंदाजानुसार, या निर्णयामुळे ग्राहकांची दरवर्षी सुमारे 2,500 कोटी रुपयांची बचत होण्याची अपेक्षा आहे. मात्र, प्रत्यक्ष बचत रुग्ण वापरत असलेल्या औषधांवर आणि त्यांच्या सुधारित किमतींवर अवलंबून असेल.
ग्रेटर नोएडात एकाच कुटुंबातील पाच जणांचा मृत्यू, नूडल्स खाल्ल्याने विषबाधा? पोलिसांचा तपास सुरू
दरम्यान, रुग्णांना औषधांच्या नव्या किमती तपासण्यासाठी NPPA ची अधिकृत वेबसाइट किंवा ‘Pharma Sahi Daam’ ॲपचा वापर करता येईल. 9 नोव्हेंबर 2026 पासून लागू होणाऱ्या सुधारित दरांची माहिती तपासूनच औषधे खरेदी करणे उपयुक्त ठरेल.
