पुणे शिक्षक मतदारसंघात एकनाथ शिंदेंचा भाजपला धक्का, अधिकृत पाठिंब्याची घोषणा केल्याने खळबळ

पुणे शिक्षक मतदारसंघाच्या विधान परिषद निवडणुकीत एकनाथ शिंदे यांच्या शिवसेनेने अपक्ष उमेदवारला पाठिंबा दिल्याने राजकारणात खळबळ उडाली आहे.

Pune Teachers Constituency : राज्यात सध्या विधान परिषद निवडणुकांची (Pune) चर्चा रंगली असून शिक्षक आणि पदवीधर मतदारसंघांसह एकुण पाच जागांसाठी निवडणूक होणार आहे. पुणे शिक्षक मतदारसंघाच्या जागेवरुन भाजप आणि शिवसेना शिंदे गटात सुरुवातीपासुनच चुरस पाहायला मिळाली होती. दोन्ही पक्षांकडुन या जागेवर दावा केला जात होता. मात्र, महायुतीच्या जागावाटपात अखेर भाजपने बाजी मारली आणि ही जागा भाजपच्या वाट्याला गेली. त्यानंतर भाजपच्या उमेदवाराने निवडणुकीसाठी अर्ज दाखल केला असतानाही शिंदे गटाचे इच्छुक उमेदवार मंगेश चिवटे यांनीही उमेदवारी अर्ज भरला होता. त्यामुळे या मतदारसंघातील राजकीय घडामोडींकडे सर्वांचे लक्ष लागले होते.

दरम्यान, जागावाटपात पुणे शिक्षक मतदारसंघ भाजपला मिळाल्यानंतरही मंगेश चिवटे यांनी उमेदवारी अर्ज दाखल केल्याने महायुतीत नाराजी निर्माण झाल्याची चर्चा सुरु झाली होती. मात्र, अर्ज मागे घेण्याच्या शेवटच्या दिवशी चिवटे यांनी आपला अर्ज मागे घेतला. या घडामोडीनंतर उपमुख्यमंत्री एकनाथ शिंदे नाराज असल्याची चर्चा राजकीय वर्तुळात रंगली. दुसरीकडे, भाजपकडुन शिंदे यांच्या नाराजीच्या वृत्ताचे खंडन करण्यात आले होते. आता या संपूर्ण प्रकरणाच्या पार्श्वभूमीवर शिवसेना शिंदे गटाने मोठी घोषणा केली असून, त्यामुळे भाजपला धक्का बसल्याची चर्चा सुरु झाली आहे.

पुणे शिक्षक मतदारसंघात मोठी घडामोड; एकनाथ शिंदेंच्या आदेशानंतर मंगेश चिवटेंचा मोठा निर्णय

दरम्यान याच मतदारसंघातून आणखी एक उमेदवार सचिन सानप यांनी देखील आपला अपक्ष उमेदवारी अर्ज दाखल केला आहे. सचिन सानप हे शिवसेनेचे मंत्री उदय सामंत यांचे निकटवर्तीये मानले जातात. त्यामुळे आता शिवसेनेकडून पुणे शिक्षक मतदार संघात विधान परिषद निवडणुकीसाठी सचिन सानप हे शिवसेना पक्षाचे पुरस्कृत उमेदवार असल्याची अधिकृत घोषणा करण्यात आली आहे.

या बाबतचं पत्रक देखील जारी करण्यात आलं आहे. या मतदारसंघात आता हा भाजपसाठी मोठा धक्का मानला जात आहे. शिवसेना शिंदे गटाच्या या निर्णयामुळे आता भाजपाच्या उमेदवाराचं टेन्शन वाढलं आहे. शिवसेना शिंदे गटाने घेतलेल्या या भुमिकेमुळे या मतदारसंघात आता मोठी चुरस पहायला मिळण्याची शक्यता आहे.

संबंधित बातम्या