live now

LIVE : नितीश कुमार, चंद्राबाबूंसह भाजपकडून आजच सत्तास्थापनेचा दावा; संध्याकाळी मोदी राष्ट्रपतींना भेटणार

एनडीएच्या नेतेपदी नरेंद्र मोदींची निवड; चंद्राबाबू, नितीश कुमारांसह 20 नेत्यांच्या पत्रावर सह्या

भाजपच्या नेतृत्वातील एनडीएच्या घटक पक्षांनी एनडीएच्या नेता म्हणून नरेंद्र मोदी यांची निवड केली आहे. त्यानंतर आता नरेंद्र मोदी आणि भाजप हे मोदींच्या तिसऱ्या पंतप्रधान पदाच्या तयारीला लागले आहेत. सर्व घटक पक्षाच्या वीस नेत्यांनी या प्रस्तावावर सह्या केलेल्या आहेत. यामध्ये सर्वाधिक चर्चा ज्या दोन नेत्यांची होती त्या चंद्राबाबू नायडू आणि नितीश कुमार यांच्या देखील या पत्रावर सह्या आहेत.

संध्याकाळी मोदी राष्ट्रपतींना भेटणार; नितीश कुमार, चंद्राबाबुंच्या साथीनं सत्तास्थापनेसाठीची बैठक समाप्त

भाजपच्या नेतृत्वातील एनडीए बिहारचे मुख्यमंत्री नितीश कुमार आणि एन चंद्रबाबू नायडू यांच्यासोबत बैठक पार पडली. त्यानंतर आता पंतप्रधान मोदी संध्याकाळी सत्ता स्थापनेच्या दावा करण्यासाठी राष्ट्रपतींचे भेट घेणार आहेत. यावेळी एनडीएच्या घटक पक्षाचे नेते देखील राष्ट्रपतींच्या भेटीला जाणार असल्याची माहिती समोर आली आहे.

मोदी राष्ट्रपती भवनात दाखल, ‘या’ तारखेला घेणार शपथ

 लोकसभा निवडणुकीचे निकाल (Lok Sabha Election Result) काल समोर आले आहेत. भाजपच्या नेतृत्वाखालील एनडीएने (NDA) 292 जागा जिंकून बहुमत प्राप्त केले आहे. त्यामुळं आता भाजपने सरकार स्थापन करण्यासाठी हालचाली सुरू केल्या आहेत. त्याचाच भाग म्हणून पंतप्रधान नरेंद्र मोदी (Narendra Modi) राष्ट्रपती भवनात दाखल झाले आहेत.

17 व्या लोकसभेची मुदत संपत असून लवकरच नवे सरकार स्थापन होणार आहे. त्यासाठी पंतप्रधान नरेंद्र मोदींनी राष्ट्रभवन गाठले आहे. त्यांनी आपल्या पंतप्रधानपदाचा राजीनामा राष्ट्रपती मुर्मू यांच्याकडे सुपूर्द केला आहे. स्वत: राष्ट्रपतींना ट्वीट करून याबाबत माहिती दिली आहे. मुर्मू यांनी मोदींचा राजीनामा मंजूर केला असू्न आजपासून मोदी काळजीवाहू पंतप्रधान म्हणून जबाबदारी सांभाळणार आहेत.

राज्यातील घडामोडींना वेग, सरकार बरखास्त अन् महायुती फुटीच्या उंबरठ्यावर?

राज्यातील पराभवाची जबाबदारी घेत उपमुख्यामंत्री देवेंद्र फडणवीस यांनी सरकारमधून मला मुक्त करावे अशी विनंती भाजप नेतृत्वाकडे केली आहे. जेणे करून आपल्याला आगामी विधानसभा निवडणुकीची तयारी करण्यासाठी पुरेसा वेळ मिळेल. असंही फडणवीस म्हणाले. त्यामुळे फडणवीसांनी पद सोडल्यास शिंदे आणि अजित पवार एकत्र राहणार का? तसेच पराभवामुळे उद्विग्न झालेला अजित पवार गट पुन्हा माघारी फिरणार का? त्यामुळे पर्यायाने राज्यातील सरकार बरखास्त होऊन महायुती फुटीच्या उंबरठ्यावर आहे का ? अशा एक ना अनेक चर्चांना उधान आले आहे. त्याचबरोबर दुसरीकडे उपमुख्यमंत्र्यांच्या सागर बंगल्यावर महायुतीच्या नेत्यांची खलबत सुरू झाले आहेत. त्यामुळे या चर्चांना दुजोरा मिळत आहे.

देवेंद्रजी कर्तृत्ववान नेते वडेट्टीवारांनी लगावला टोला...

देवेंद्रजी कर्तृत्ववान नेते आहेत. अडीच वर्षापूर्वी त्यांना मुख्यमंत्री व्हायचं होत. पण त्यांना उपमुख्यमंत्री केले गेले. तसेच महायुती सरकारने अडीच वर्ष जे काम केले. त्यामुळे आम्हाला लोकसभेत जास्त जागा मिळाल्या. त्यामुळे त्यांनी असाच परफॉर्मन्स करावा. म्हणजे विधान सभेतही आम्हाला चांगले यश मिळेल. त्यामुळे त्यांनी मंत्रीपदावर राहावे. असं म्हणून विरोधी पक्षनेते विजय वडेट्टीवार यांनी फडणवीस आणि भाजपला टोला लगावला आहे.

आम्हाला मान्य नाही, सरकारमध्ये राहुनही काम करता येतं; बावनकुळेंची फडणवीसांना साद

देवेंद्र फडणवीसांचा (Devendra Fadnvis) निर्णय आम्हाला मान्य नसून सरकारमध्ये राहुनही संघटनेचं काम करता येतं, अशी साद भाजपचे प्रदेशाध्यक्ष चंद्रशेखर बावनकुळे (Chandrashekhar Bawankule) यांनी उपमुख्यमंत्री देवेंद्र फडणवीस यांना घातलीयं. दरम्यान, लोकसभा निवडणुकीत मिळालेल्या अपयशानंतर देवेंद्र फडणवीस यांनी मला सरकारमधून जबाबदारीतून मुक्त करण्याची भावना व्यक्त केलीयं. त्यावर बोलताना चंद्रशेखर बावनकुळे यांनी आपली भूमिका मांडलीयं.

आम्हाला संविधान बदलणार या नेरेटिव्हचा मोठ्या प्रमाणात फटका बसला

पुन्हा एकदा देशातील जनतेने एनडीएला पूर्ण बहुमत दिले आणि पंतप्रधान नरेंद्र मोदी सलग तिसऱ्यांदा भारताचे पंतप्रधान होतील. एकट्या भाजपने इंडिया आघाडीपेक्षा जास्त जागा जिंकल्या आहेत. मात्र, निवडणुकीतील जनतेचा जनादेश आहे तसा स्वीकारला पाहिजे. आम्ही सखोल आत्मपरीक्षण करू आणि पुढील विधानसभा निवडणुकीत आमचे नुकसान भरून काढू असं उपमुख्यमंत्री देवेंद्र फडणवीस म्हणाले.

तसेच संविधान बदलणार या नेरेटिव्हचा फटका या लोकसभा निवडणुकीत आम्हाला मोठ्या प्रमाणात बसला याची कबुली देखील यावेळी उपमुख्यमंत्री देवेंद्र फडणवीस यांनी दिली.