प्रेयसीने मृतदेहाशी केलं लग्न; अंगाला हळद अन् कपाळावर भरलं कुंकू, केली ‘ही’ मागणी
सक्षमचा मृतदेह घरी आणताच तिने टाहो फोडला. अंत्यविधीपूर्वी तिने हळद आणि कुंकू लावून घेतलं शिवाय कपाळावर कुंकू भरलं.
- Written By: ganesh pokale Published:
नांदेड शहरात एक धक्कादायक घटना घडली आहे. (Mumbai) काल (दि. 29) गुरुवारी संध्याकाळी प्रेमप्रकरणातून एका मुलीच्या कुटुंबीयांनी एका तरुणाचा खून केला होता. सक्षम ताटे या तरुणाला मुलीचे वडील आणि भावाने पाठलाग करुन गोळ्या घालून मारल्याचा प्रकार घडला होता. सक्षम ताटे याचे त्याच्या मित्राची बहीण आंचल मामीलवाड हिच्याशी प्रेमसंबंध होते.
याची कुणकुण लागल्यानंतर आंचलच्या वडिलांनी सक्षमला आपल्या मुलीपासून दूर राहण्यास सांगितलं होतं. मात्र, त्यानंतरही या दोघांचे प्रेमप्रकरण सुरु राहिल्याने गुरुवारी संध्याकाळी नांदेड शहरातील जुना गंज भागात आंचलचे वडील आणि भावाने सक्षमची हत्या केली होती. या घटनेनंतर सक्षम ताटे याच्यावर अंत्यसंस्कार करण्यात आले होते. त्यावेळी त्याची प्रेयसी आंचल मामीलवाड हिने सक्षमच्या अंत्यसंस्कारासाठी त्याच्या घरी गेली होती. तेव्हा तिने सक्षमच्या मृतदेहासमोर लग्नाचे काही विधी केले. तसंच तिने सगळ्यांदेखत कपाळावर सक्षमच्या नावाचं कुंकू लावलं.
अनैतिक संबंध टिकवण्यासाठी प्रियकराच्या मदतीने पत्नीचं मोठं कांड; धक्कादायक सत्य बाहेर
सक्षमचा मृतदेह घरी आणताच तिने टाहो फोडला. अंत्यविधीपूर्वी तिने हळद आणि कुंकू लावून घेतलं शिवाय कपाळावर कुंकू भरलं. यावेळी सक्षमला देखील हळद लावण्यात आली. हा प्रसंग पाहून उपस्थितांना अश्रू अनावर झाले होते. सक्षम आणि आंचल याचे गेल्या तीन वर्षांपासून प्रेमसंबंध होते. मात्र, सक्षम वेगळ्या जातीचा असल्याने हे प्रेमसंबंध आंचलच्या घरच्यांना मान्य नव्हते. सक्षम ताटे जेलमधून सुटून आल्यानंतर माझ्या कुटुंबातील लोक त्याच्या खूनाचा कट रचत होते, असं आंचलने सांगितलं.
आमच्या प्रेमसंबंधाला विरोध असल्याने माझ्या वडिलांनी आणि भावाने सक्षमला मारलं पण ते हरले आणि माझा प्रियकर मरून पण जिंकला. आपल्या वडिलांना आणि भावाला फाशीची शिक्षा व्हावी, अशी मागणीही आंचलने केली आहे. पोलिसांनी आंचलचे वडील गजानन मामीलवाड यांच्यासह पाच जणांना पोलिसांनी अटक केली आहे. जयश्री मदनसिंह ठाकूर,गजानन बालाजीराव मामीलवाड,साहील ठाकूर,सोमाश लखे, वेदांत अशी आरोपींची नावे आहेत.
