राज्यात मान्सूनपूर्व पावसाचे आगमन; मुंबईसह कोकणातील अनेक जिल्ह्यांना हवामान विभागाचा सतर्कतेचा इशारा

दरम्यान, भारतीय हवामान विभागाने (IMD) मुंबई आणि पालघर जिल्ह्यांसाठी पुढील तीन तासांसाठी ‘यलो अलर्ट’ जारी केला आहे.

Meteorological Department’s alert : गेल्या काही दिवसांपासून राज्यभरात उन्हाचा चटका वाढला होता. अनेक शहरांमध्ये तापमानाचा पारा 40 अंश सेल्सिअसच्या पुढे गेल्याने नागरिक उकाड्याने अक्षरशः हैराण झाले होते. अशा परिस्थितीत रविवारी पहाटेपासून मुंबईसह राज्यातील अनेक भागांत मान्सूनपूर्व पावसाने दमदार हजेरी लावली. या पावसामुळे वातावरणात गारवा निर्माण झाला असून नागरिकांना उष्णतेपासून मोठा दिलासा मिळाला आहे. मात्र, अचानक झालेल्या पावसाचा परिणाम मुंबईच्या वाहतूक व्यवस्थेवरही दिसून आला.

मुंबईत मध्यरात्रीनंतर अनेक भागांमध्ये ढगांच्या गडगडाटासह पावसाला सुरुवात झाली. पहाटे आणि सकाळच्या वेळेत शहर व उपनगरांमध्ये हलक्या ते मध्यम स्वरूपाच्या सरी कोसळल्या. त्यामुळे रविवारी सकाळी नेहमीप्रमाणे मॉर्निंग वॉक, व्यायाम किंवा इतर कामांसाठी घराबाहेर पडलेल्या नागरिकांची धावपळ उडाली. अनेकांना अचानक आलेल्या पावसापासून बचाव करण्यासाठी आसरा शोधावा लागला. तरीही प्रखर उष्णतेनंतर आलेल्या या पावसाचे मुंबईकरांनी स्वागतच केले.

दरम्यान, भारतीय हवामान विभागाने (IMD) मुंबई आणि पालघर जिल्ह्यांसाठी पुढील तीन तासांसाठी ‘यलो अलर्ट’ जारी केला आहे. हवामान विभागाच्या अंदाजानुसार, या कालावधीत काही भागांत विजांच्या कडकडाटासह मेघगर्जना होण्याची शक्यता आहे. तसेच हलका ते मध्यम स्वरूपाचा पाऊस पडण्यासोबतच ताशी 30 ते 40 किलोमीटर वेगाने वारे वाहू शकतात. त्यामुळे नागरिकांनी अनावश्यकपणे घराबाहेर पडणे टाळावे, तसेच झाडे, होर्डिंग्ज किंवा कमकुवत संरचनांजवळ थांबू नये, असे आवाहन करण्यात आले आहे.

पावसाचा परिणाम मुंबईच्या जीवनवाहिनी मानल्या जाणाऱ्या उपनगरीय रेल्वे सेवांवरही झाला आहे. मध्य रेल्वे, हार्बर रेल्वे आणि पश्चिम रेल्वे मार्गावरील अनेक लोकल गाड्या सुमारे 25 मिनिटे उशिराने धावत असल्याची माहिती समोर आली आहे. रविवारी सुट्टीचा दिवस असला तरी रेल्वेच्या विलंबामुळे अनेक प्रवाशांची गैरसोय झाली. काही स्थानकांवर प्रवाशांना गाड्यांची प्रतीक्षा करावी लागली. पावसाचा जोर वाढल्यास रेल्वे आणि रस्ते वाहतुकीवर आणखी परिणाम होण्याची शक्यता प्रशासनाने व्यक्त केली आहे.

सरकारने मान्य केल्या मनोज जरांगे यांच्या प्रमुख मागण्या; अडीच तासांच्या चर्चेनंतर उपोषण स्थगित

हवामान खात्याच्या अंदाजानुसार, मुंबईत रविवारपासून पुढील तीन दिवस पावसाचे वातावरण कायम राहण्याची शक्यता आहे. शहरात अधूनमधून हलक्या ते मध्यम स्वरूपाच्या सरी कोसळू शकतात. यामुळे तापमानात घट होऊन वातावरण अधिक आल्हाददायक राहण्याची शक्यता आहे. तसेच पालघर आणि ठाणे जिल्ह्यांसाठी सोमवारीही मेघगर्जनेसह पावसाचा यलो अलर्ट जारी करण्यात आला आहे.

कोकण पट्ट्यातील रायगड, रत्नागिरी आणि सिंधुदुर्ग जिल्ह्यांमध्ये सोमवार आणि मंगळवारी पावसाची तीव्रता आणखी वाढू शकते, असा अंदाज हवामान विभागाने वर्तवला आहे. काही ठिकाणी जोरदार सरींसह वादळी वाऱ्यांची शक्यता असल्याने स्थानिक प्रशासनाला सतर्क राहण्याच्या सूचना देण्यात आल्या आहेत. शेतीची कामे सुरू असलेल्या भागांतील शेतकऱ्यांनाही हवामानाचा अंदाज लक्षात घेऊन नियोजन करण्याचा सल्ला देण्यात आला आहे.

मान्सून केरळमध्ये दाखल झाल्यानंतर महाराष्ट्रातही पावसासाठी अनुकूल वातावरण तयार होत असल्याचे संकेत हवामान तज्ज्ञांकडून दिले जात आहेत. त्यामुळे येत्या काही दिवसांत राज्यातील अनेक भागांत मान्सूनपूर्व पावसाचा जोर वाढण्याची शक्यता आहे. सध्या या पावसामुळे उकाड्याने त्रस्त झालेल्या नागरिकांना मोठा दिलासा मिळाला असला, तरी वादळी वारे, विजांचा कडकडाट आणि वाहतुकीवरील संभाव्य परिणाम लक्षात घेता नागरिकांनी सतर्क राहण्याची गरज असल्याचे हवामान विभागाने स्पष्ट केले आहे.

संबंधित बातम्या