कुणाबाबत बोलतो हे लक्षात घेऊन बोला.., उगाचच उचलली जीभ लावली टाळ्याला नको, रोहिणी खडसेंचा हल्लाबोल

Rohini Khadse On Chitra Wagh : माझ्या वडिलांचं नाव घेऊन बोलण्याआधी त्यांच्या गेल्या 40 वर्षांच्या राजकीय कारकीर्दीची तरी माहिती घ्यावी ! ते कोण आहेत, भाजप या पक्षासाठी त्यांचं योगदान काय… याची माहिती कृपा करून तुमच्या वरिष्ठ नेत्यांकडून जाणून घ्यावी आणि मग बोलावं असा शब्दात राष्ट्रवादी काँग्रेस पार्टी शरदचंद्र पवार पक्षाच्या (NCPSP) महिला प्रदेशाध्यक्षा रोहिणी खडसे (Rohini Khadse) यांनी आमदार चित्रा वाघ (Chitra Wagh) यांना सुनावले आहे.

प्रदेशाध्यक्षा रोहिणी खडसे यांनी सोशल मीडियावर आपली प्रतिक्रिया दिली आहे. त्या म्हणाल्या की, तुम्ही ज्या पक्षाकडून विधान परिषदेच्या सदस्या झाला आहात त्या पक्षाला शून्यातून एका वटवृक्षात रुपांतर करण्यात, वाढवण्यात ज्या ठराविक लोकांची नावे घेतली जातात‌, त्यात माझ्या वडिलांचे नाव अग्रक्रमाने येते. चार पक्ष फिरून येऊन तुम्ही आरामात ज्या पक्षाच्या विधान परिषदेची जागा मिळवलीय ना आणि भाजपसारख्या भल्या मोठ्या वटवृक्षाच्या सावलीत आरामात बसलात ना, त्यात माझ्या वडिलांचे कष्ट आहेत.

विचारा तुमच्या वरिष्ठांना… शेतकरी, दुर्लक्षित घटक, ओबीसी बांधव आणि शेवटच्या घटकापर्यंतच्या माणसाला न्याय देण्याचा प्रयत्न करत ते इथवर आलेले आहेत आणि लोकांच्या प्रश्नांना वाचा फोडण्याचा प्रवास आजतागायत सुरूच आहे. यात कधी त्यांनी आकांडतांडव करून प्रसिद्धी मिळवली नाही ! त्यामुळे आपण कुणाबाबत बोलतो हे लक्षात घेऊन बोला… उगाचच उचलली जीभ लावली टाळ्याला नको…. असं रोहिणी खडसे या पोस्टमध्ये म्हणाल्या.

माझ्या वडिलांचं नाव घेऊन बोलण्याआधी त्यांच्या गेल्या ४० वर्षांच्या राजकीय कारकीर्दीची तरी माहिती घ्यावी ! ते कोण आहेत, भाजप या पक्षासाठी त्यांचं योगदान काय… याची माहिती कृपा करून तुमच्या वरिष्ठ नेत्यांकडून जाणून घ्यावी आणि मग बोलावं…

तुम्ही ज्या पक्षाकडून विधान परिषदेच्या…

— Adv Rohini Eknathrao Khadse (@Rohini_khadse) March 22, 2025

काय म्हणाल्या होत्या चित्रा वाघ?

विधान परिषदेमध्ये भाजप नेत्या चित्रा वाघ यांनी शिवसेना ठाकरे गटाचे आमदार अनिल परब यांच्यावर टीका करत तुमच्यासारखे 56 मी पायाला बांधून फिरते अशी टीका केली होती. त्यानंतर राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी सोशल मीडियावर एक व्हिडीओ पोस्ट करत चित्रा वाघ यांच्यावर टीका केली होती. या टीकेला प्रत्युत्तर देत चित्रा वाघ यांनी रोहिणी खडसे यांचे वडील विधान परिषदेत माझ्या समोर बसतात. त्यांनी त्यांना विचारावं, ते जास्त चांगलं सांगतील. असं म्हणाल्या होत्या.

मुस्लिमांना डोळे दाखवणाऱ्यांना माफ करणार नाही, उपमुख्यमंत्री अजित पवार स्पष्टच बोलले

संबंधित बातम्या