मोठी बातमी! अंडरवर्ल्ड डॉन अरुण गवळीची नागपूर तुरुंगातून 18 वर्षांनी सुटका; वाचा, प्रकरण काय?
- Written By: ganesh pokale Published:
Don Arun Gawli Released From Prison : अंडरवर्ड डॉन अरुण गवळीची नागपूर (Gawli) मध्यवर्ती कारागृहातून सुटका झाली आहे. मागच्या गेटने पोलिसांनी मीडियापासून लपवत अरुण गवळी यांची सुटका केली आहे. अंडरवर्ल्ड डॉन अरुण गवळीची 18 वर्षांनंतर नागपूर तुरुंगातून सुटका झाली आहे, सर्वोच्च न्यायालयाकडून जामीन मंजूर केल्यानंतर आज त्यांची सुटका झाली आहे.
सर्वोच्च न्यायालयाने अंडरवर्ल्ड डॉन अरुण गवळीला जामीन मंजूर केला आहे. अरुण गवळीला मुंबई शिवसेना नगरसेवक कमलाकर जामसांडेकर यांच्या हत्येप्रकरणी नागपूर मध्यवर्ती कारागृहात जन्मठेपेची शिक्षा भोगत होता. नागपूर पोलिसांनी सुरक्षा व्यवस्थेत अरुण गवळी याला नागपूरच्या डॅा बाबासाहेब आंबेडकर विमानतळ पर्यंत आणले. आता अरुण गवळी विमानाने मुंबईच्या दिशेने रवाना होईल.
मुंबईत २००७ मध्ये शिवसेना नगरसेवक कमलाकर जामसांडेकर हत्येप्रकरणी जन्मठेपेची शिक्षा भोगत असलेला कुख्यात गुंड डॅडी उर्फ अरुण गवळी याला सर्वोच्च न्यायालयाने गुरुवारी जामीन मंजूर केला होता. नागपूर मध्यवर्ती कारागृहात शिक्षा भोगणारा गवळी मागील १८ वर्षांपासून जामिनासाठी प्रयत्न करत होता. जामसांडेकर यांची घाटकोपर येथे त्यांच्या निवासस्थानी भरदिवसा हत्या करण्यात आली होती. या प्रकरणात १८ वर्षानंतर अरुण गवळी याला जामीन मंजूर झाला.
जामीन मंजूर करण्यात आल्याने त्याच्या सुटकेचा मार्ग मोकळा झालेला आहे. मात्र सर्वोच्च न्यायालयाने जामीन मंजूर केला असला तरी त्यासंदर्भातील अटी-शर्ती सत्र न्यायालय निश्चित करेल असे स्पष्ट केले होते. त्यामुळे मुंबई सत्र न्यायालयातून अटी-शर्ती निश्चित झाल्यावर जामिनासंदर्भात ऑर्डर जारी झाली. त्याची प्रत नागपूर मध्यवर्ती कारागृहात आल्यानंतर आज अरूण गवळीची सुटका करण्यात आली आहे.
