उद्योगपती अनिल अंबानी समूहाला ED चा आणखी एक झटका; 510 कोटींची मालमत्ता जप्त

Anil Ambani Group ED Action : निल अंबानी समूहाविरोधातील तपासात ईडीने पुन्हा मोठी कारवाई केली आहे. त्यामुळं अंबानी यांच्या अडचणीव वाढणार आहेत.

Anil Ambani Group ED Action : उद्योगपती अनिल अंबानी यांच्या समूहाविरोधात अंमलबजावणी संचालनालयाने (ED) पुन्हा मोठी कारवाई केली आहे. समूहाच्या विविध कंपन्यांशी संबंधित आर्थिक गैरव्यवहारांच्या प्रकरणात ईडीने आणखी 510 कोटी रुपयांची मालमत्ता जप्त केली आहे. यामध्ये रिलायन्स कम्युनिकेशनच्या बँक फसवणूक प्रकरणातील 247.12 कोटी रुपये, तर रिलायन्स होम फायनान्स (RHFL) आणि रिलायन्स कमर्शियल फायनान्स (RCFL) यांच्याशी संबंधित 263.05 कोटी रुपयांच्या मालमत्तेचा समावेश आहे. या कारवाईमुळे अनिल अंबानी समूहाच्या अडचणी पुन्हा वाढल्या आहेत.

रिलायन्स कम्युनिकेशनशी संबंधित प्रकरणात ईडीने दोन चार्टर्ड विमाने, जमिनीचे सहा भूखंड आणि महाराष्ट्रातील एका कार्यालयीन जागेवर जप्तीची कारवाई केली आहे. तर RHFL आणि RCFL प्रकरणात तामिळनाडूमधील दोन पवनचक्क्या जप्त करण्यात आल्या आहेत. याशिवाय बँक खात्यांमधील शिल्लक रक्कम, मुदत ठेवी, विविध गुंतवणुका आणि येणे बाकी असलेल्या रकमेचाही जप्त मालमत्तेत समावेश आहे. वेगवेगळ्या कंपन्यांशी संबंधित आर्थिक व्यवहारांचा तपास करत ईडीने ही कारवाई केली आहे.

अनिल अंबानींच्या अडचणी वाढल्या; रिलायन्स पॉवरची 2,032 कोटींची मालमत्ता ईडीकडून जप्त

या ताज्या कारवाईनंतर अनिल अंबानी समूहाविरोधात ईडीने आतापर्यंत जप्त केलेल्या मालमत्तेचे एकूण मूल्य सुमारे 23,100 कोटी रुपयांवर पोहोचले आहे. बँका आणि वित्तीय संस्थांकडून घेतलेल्या सार्वजनिक निधीचा कथित अपहार करण्यात आल्याचा ईडीचा आरोप आहे. हा निधी परदेशातील टॅक्स हेवनमध्ये वळवण्यात आल्याचा, तसेच प्रवर्तक आणि त्यांच्या कुटुंबीयांच्या वैयक्तिक फायद्यासाठी त्याचा वापर झाल्याचा संशय तपास यंत्रणेने व्यक्त केला आहे. याच आर्थिक व्यवहारांच्या आधारे समूहातील विविध कंपन्यांची चौकशी सुरू आहे.

या प्रकरणांमध्ये ईडीने आतापर्यंत 10 जणांना अटक केली आहे. तसेच मनी लाँडरिंग प्रतिबंधक कायदा म्हणजेच PMLA अंतर्गत सहा अभियोग तक्रारी दाखल करण्यात आल्या असून, परकीय चलन व्यवस्थापन कायदा (FEMA) अंतर्गतही एक तक्रार नोंदवण्यात आली आहे. CBI दिल्ली, आर्थिक गुन्हे शाखा (EOW) दिल्ली आणि EOW मुंबई यांनी दाखल केलेल्या विविध FIR च्या आधारे ईडीचा तपास सुरू आहे. या प्रकरणांतील आर्थिक व्यवहार आणि निधीच्या हस्तांतरणाची साखळी तपासली जात आहे.

दरम्यान, अनिल अंबानी समूहातील कंपन्यांनी बँका आणि वित्तीय संस्थांकडून घेतलेल्या निधीचा वापर कशा पद्धतीने केला, हा तपासाचा महत्त्वाचा भाग आहे. कर्जाच्या स्वरूपात मिळालेला सार्वजनिक पैसा कथितपणे इतरत्र वळवण्यात आल्याचा आणि त्यातून प्रवर्तकांना वैयक्तिक लाभ झाल्याचा ईडीचा आरोप आहे. या आरोपांच्या अनुषंगाने मालमत्ता, गुंतवणूक, बँक खाती आणि परदेशातील व्यवहारांची तपासणी केली जात आहे. मात्र, तपास यंत्रणेने केलेले आरोप आणि त्याबाबतचे अंतिम न्यायालयीन निष्कर्ष या वेगळ्या बाबी आहेत.

अनिल अंबानी समूहाविरोधात सुरू असलेल्या या कारवायांमुळे हजारो कोटी रुपयांच्या मालमत्तेवर जप्तीची प्रक्रिया झाली आहे. नव्याने जप्त करण्यात आलेल्या 510 कोटी रुपयांच्या मालमत्तेमुळे या प्रकरणाची व्याप्ती पुन्हा चर्चेत आली आहे. ईडीच्या तपासात निधी नेमका कुठे वळवण्यात आला, त्याचा लाभ कोणाला झाला आणि विविध कंपन्यांमधील व्यवहारांचे परस्पर संबंध काय आहेत, याचा शोध घेतला जात आहे. आगामी काळात या तपासातून आणखी कोणती माहिती समोर येते, याकडे लक्ष लागले आहे.

संबंधित बातम्या