अजित पवारांच्या राष्ट्रवादीची बुलंद तोफ पक्षाला सोडचिठ्ठी देणार, ठोंबरेंनी घेतली श्रीकांत शिंदेंची भेट

श्रीकांत शिंदे यांना भेटले, माझ्यासोबत काँग्रेसच्या संगिता तिवारी आणि शिंदे गटाच्या शर्मिष्ठा येवले देखील यावेळी उपस्थित होत्या.

राष्ट्रवादी अजित पवार गटाच्या रुपाली ठोंबरे पाटील (Pune) गेल्या काही महिन्यांपासून पक्षात नाराज असल्याची चर्चा आहे. सत्ताधारी पक्षात असूनही अपेक्षेप्रमाणे त्यांना जबाबदारी मिळाली असून याउलट पक्षाच्या महिला प्रदेशाध्यक्षा रुपाली चाकणकर यांच्यासोबत त्यांचे खटके उडाल्याने त्यांच्या पक्षांतराची चर्चा होत आहे. अशातच त्यांनी शिवसेना शिंदे गटाचे खासदार श्रीकांत शिंदे यांची भेट घेतली आहे.

रुपाली पाटील यांनी खासदार श्रीकांत शिंदे यांची मुंबईत भेट घेतल्यानंतर व्हिडिओच्या माध्यमातून संवाद साधला. शिवसेनेने जर मला ऑफर दिली तर मी विचार करेन, असं म्हणत त्यांनी स्पष्टपणे पक्षबदलाचे संकेत दिले आहेत. अजित पवारांच्या राष्ट्रवादीच्या प्रवक्त्या राहिलेल्या रुपाली पाटील शिंदेच्या शिवसेनेत प्रवेश करणार असल्याच्या चर्चा सुरू आहे. रूपाली पाटील गेल्या काही दिवसांपासून अजित पवारांच्या राष्ट्रवादीत नाराज आहेत.

मी पक्षाची शिस्त मोडलेली नाही; रुपाली ठोंबरे यांचा पक्षाला खुलासा, राष्ट्रवादीला सोडचिठ्ठी देणार का ?

मी महायुतीतील घटक पक्ष म्हणून, कामानिमित्त श्रीकांत शिंदे यांना भेटले, माझ्यासोबत काँग्रेसच्या संगिता तिवारी आणि शिंदे गटाच्या शर्मिष्ठा येवले देखील यावेळी उपस्थित होत्या. मात्र, आपली भेट राजकीय नसल्याचे त्यांनी म्हटले. पण, काम करणाऱ्या कार्यकर्तीला काही ऑफर दिल्यास नक्कीच विचार करेन, असंही त्यांनी स्पष्ट केलं आहे. दरम्यान, महिला आयोगाच्या अध्यक्षा तथा राष्ट्रवादी काँग्रेसच्या महिला प्रदेशाध्यक्षा रुपाली चाकणकर यांच्यावर टीका केल्यामुळे पक्षाकडून अलीकडेच रुपाली ठोंबरे पाटील यांना पक्षशिस्तीचा भंग केल्याप्रकरणी कारणे दाखवा नोटीस पाठण्यात आली होती.

यावर त्या म्हणाल्या, मी कुठंही पक्षशिस्तीचा भंग केलेला नाही. फलटणमधील डॉक्टर तरुणीच्या मृत्यूसंदर्भात राज्य महिला आयोगाच्या अध्यक्षांच्या मताशी मी सहमत नाही, हे माझे मत मी मांडले होते. मला पक्षाने खुलासा पत्र मागितलं होते. राज्य महिला आयोग आणि प्रदेशाध्यक्ष रुपाली चाकणकर यांच्याबद्दल वक्तव्य केल्याबद्दल मी खुलासा दिला आहे. फलटण प्रकरणावर त्या जे काही बोलल्या त्यामुळे महाराष्ट्रभर असंतोष निर्माण झाला. मी कोणाबद्दल वाईट वक्तव्य केलेले नाही. मला पक्षाकडून नोटीस का देण्यात आली, मला याची कल्पना नाही, असंही त्या म्हणाल्या आहेत.

संबंधित बातम्या