स्वातंत्र्य दिनानिमित्त अहिल्यानगर जिल्ह्यातील 30 पोलीस अधिकारी आणि कर्मचाऱ्यांना राष्ट्रपती पदकांसह विविध सन्मान

अहिल्यानगर जिल्हा पोलीस दलातील अनेक अधिकारी आणि कर्मचाऱ्यांचा समावेश असून जिल्ह्यासाठी ही अभिमानाची बाब मानली जात आहे.

Various honors including Presidential Medals : स्वातंत्र्य दिनाच्या पार्श्वभूमीवर भारत सरकारने देशभरातील पोलीस दलातील उल्लेखनीय सेवा बजावणाऱ्या अधिकारी आणि कर्मचाऱ्यांच्या नावांची घोषणा केली आहे. कर्तव्यदक्षता, प्रामाणिकपणा, शिस्तबद्ध सेवा आणि जनतेच्या सुरक्षेसाठी दिलेल्या योगदानाची दखल घेत राष्ट्रपती पोलीस पदक, अतिउत्कृष्ट सेवा पदक आणि उत्कृष्ट सेवा पदक असे विविध सन्मान जाहीर करण्यात आले आहेत. यामध्ये अहिल्यानगर जिल्हा पोलीस दलातील अनेक अधिकारी आणि कर्मचाऱ्यांचा समावेश असून जिल्ह्यासाठी ही अभिमानाची बाब मानली जात आहे.

गुणवत्तापूर्ण आणि उल्लेखनीय सेवेसाठी प्रदान करण्यात येणाऱ्या राष्ट्रपती पोलीस पदकासाठी श्रेणी पोलीस उपनिरीक्षक संपत मुरलीधर खैरे, श्रेणी पोलीस उपनिरीक्षक शैलेश चंद्रकांत उपासने आणि सहाय्यक पोलीस उपनिरीक्षक अन्वरअली सय्यदअली सय्यद यांची निवड करण्यात आली आहे. पोलीस दलात दीर्घकाळ उत्कृष्ट सेवा बजावताना त्यांनी विविध जबाबदाऱ्या यशस्वीपणे पार पाडल्या असून त्यांच्या कार्याची दखल घेत हा प्रतिष्ठेचा सन्मान जाहीर करण्यात आला आहे.

तसेच 25 वर्षांची सेवा पूर्ण केलेल्या आणि आपल्या सेवाकाळात अतिउत्कृष्ट कामगिरी केलेल्या पाच अधिकारी व कर्मचाऱ्यांना अतिउत्कृष्ट सेवा पदक प्रदान करण्यात आले आहे. यामध्ये सहाय्यक पोलीस निरीक्षक हेमंत शिवाजी थोरात, श्रेणी पोलीस उपनिरीक्षक मनोहर नामदेव शेजवळ, सहाय्यक पोलीस उपनिरीक्षक अन्वरअली सय्यदअली सय्यद, सहाय्यक पोलीस उपनिरीक्षक संजय जबाजी खंडागळे आणि सहाय्यक पोलीस उपनिरीक्षक विजय गोरखनाथ लोंढे यांचा समावेश आहे. दीर्घ सेवाकाळात त्यांनी कायदा व सुव्यवस्था राखणे, गुन्हे प्रतिबंधक उपाययोजना राबविणे आणि पोलीस दलाची प्रतिमा उंचावण्याचे काम केल्याबद्दल त्यांचा गौरव करण्यात आला आहे.

जिल्हाधिकारी आणि पोलीस आयुक्तांच्या नेतृत्वाखाली चाकणच्या समस्यांवर तोडगा काढण्यासाठी समिती स्थापन

याशिवाय 15 वर्षे सेवा पूर्ण करून उत्कृष्ट कामगिरी करणाऱ्या 22 अधिकारी आणि कर्मचाऱ्यांना उत्कृष्ट सेवा पदक जाहीर करण्यात आले आहे. या यादीमध्ये पोलीस उपनिरीक्षक, सहाय्यक पोलीस उपनिरीक्षक आणि विविध शाखांमध्ये कार्यरत असलेल्या पोलीस हवालदारांचा समावेश आहे. शिर्डी, एमआयडीसी, जिल्हा विशेष शाखा, स्थानिक गुन्हे शाखा, आर्थिक गुन्हे शाखा, मोटार परिवहन विभाग तसेच वाचक शाखांमध्ये कार्यरत असलेल्या कर्मचाऱ्यांनी आपल्या सेवेत दाखवलेल्या कार्यक्षमतेची दखल घेत हा सन्मान प्रदान करण्यात आला आहे.

पोलीस दलातील पदके ही केवळ सेवाकालाच्या आधारे दिली जात नाहीत, तर संबंधित अधिकारी आणि कर्मचाऱ्यांच्या कामगिरीचा, शिस्तीचा, प्रामाणिकतेचा आणि जनतेप्रती असलेल्या बांधिलकीचाही विचार केला जातो. त्यामुळे या पदकांना पोलीस दलात विशेष महत्त्व प्राप्त आहे. राष्ट्रपती पोलीस पदक हे पोलीस सेवेत मिळणाऱ्या प्रतिष्ठित सन्मानांपैकी एक मानले जाते, तर अतिउत्कृष्ट आणि उत्कृष्ट सेवा पदके ही दीर्घकाळ सातत्याने उल्लेखनीय सेवा देणाऱ्या अधिकारी आणि कर्मचाऱ्यांच्या योगदानाची दखल घेणारी मानाची पदके आहेत.

पश्चिम महाराष्ट्राचा धावता दौरा संपताच मनोज जरांगे पाटील यांची तब्येत खालावली; डॉक्टरांच्या देखरेखीखाली उपचार सुरू

अहिल्यानगर जिल्हा पोलीस दलातील अधिकारी आणि कर्मचाऱ्यांनी विविध परिस्थितींमध्ये जबाबदारीने कर्तव्य बजावत कायदा व सुव्यवस्था राखण्यासाठी महत्त्वाची भूमिका बजावली आहे. गुन्हे उघडकीस आणणे, सामाजिक सलोखा राखणे, वाहतूक व्यवस्थापन, विशेष मोहिमा आणि जनसंपर्क यांसारख्या विविध क्षेत्रांत त्यांनी उल्लेखनीय कामगिरी केली आहे. या कार्याची दखल घेत भारत सरकारने त्यांचा सन्मान केला आहे.

दरम्यान, पदकप्राप्त सर्व अधिकारी आणि कर्मचाऱ्यांचा अहिल्यानगरचे पोलीस अधीक्षक मुम्मका सुदर्शन यांच्या हस्ते विशेष सत्कार करण्यात येणार आहे. त्यांना प्रशस्तीपत्र देऊन गौरविण्यात येणार असून त्यांच्या कार्याचा सन्मान केला जाणार आहे. स्वातंत्र्य दिनाच्या पूर्वसंध्येला जाहीर झालेल्या या सन्मानामुळे अहिल्यानगर जिल्हा पोलीस दलाच्या शिरपेचात मानाचा तुरा खोवला गेला असून पदकप्राप्त अधिकारी आणि कर्मचाऱ्यांवर सर्व स्तरांतून अभिनंदनाचा वर्षाव होत आहे.

संबंधित बातम्या