पडळकर- आव्हाडांमध्ये वाद पेटला, विधिमंडळात कार्यकर्ते भिडले, जाणून घ्या संपूर्ण प्रकरण

Gopichand Padalkar- Jitendra Awhad Clash: महाराष्ट्र विधिमंडळ अधिवेशनातून एक धक्कादायक बातमी समोर आली आहे. भाजपचे आमदार गोपीचंद पडळकर (Gopichand Padalkar) आणि राष्ट्रवादी काँग्रेस शरदचंद्र पवार पक्षाचे (NCPSP) आमदार जितेंद्र आव्हाड (Jitendra Awhad) यांच्या कार्यकर्त्यांमध्ये राडा झाल्याची माहिती समोर आली आहे. गेल्या काही दिवसांपासून गोपीचंद पडळकर आणि जितेंद्र आव्हाड यांच्यात वाकयुद्ध पाहायला मिळत आहे. तर बुधवारी 16 जुलैला दोघांकडून एकमेकांना शिवीगाळ करण्यात आली होती. तर आज दोन्ही नेत्यांच्या कार्यकर्त्यांमध्ये बाचाबाची होऊन मारहाण झाल्याची माहिती समोर आली आहे.

सध्या समोर आलेल्या माहितीनुसार, विधानभवनाच्या लॉबीमध्ये दोन्ही नेत्यांच्या समर्थकांमध्ये धक्काबुक्की झाली आणि यानंतर दोन्ही नेत्यांच्या कार्यकर्त्यांनी एकमेकांच्या अंगावर धावून जात मारहाण केली. तिथे उपस्थित असलेल्या सुरक्षा रक्षक आणि इतरांनी मारहाण करणाऱ्या कार्यकर्त्यांना दूर केले.

नेमकं प्रकरण काय?

राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांनी विधान भवनाच्या परिसरात आमदार गोपीचंद पडळकर यांना मंगळसूत्र चोर म्हणून डिवचले होते. यानंतर बुधवारी पडळकर आणि आव्हाड आमने- सामने आले असता दोन्हीकडून एकमेकांना शिवीगाळ करण्यात आली होती. यानंतर आमदार आव्हाड यांनी मला जिवे मारण्याची धमकी देण्यात आली असल्याचा आरोप केला होता.

तर आता दोन्ही नेत्यांचे कार्यकर्ते विधान भवनाच्या आवारात एकमेकांना भिडले. सध्या या घटनेचा व्हिडिओ व्हायरल झाला असून विरोधकांकडून राज्य सरकारवर जोरदार हल्लाबोल केला आहे.

मला मारण्यासाठी सगळे आले होते : जितेंद्र आव्हाड 

तर आमदार जितेंद्र आव्हाड यांनी देखील या प्रकरणात प्रतिक्रिया देत गंभीर आरोप केला आहे. तुम्ही विधानसभेत गुंडाना प्रवेश देणार असाल आणि ते हल्ले करणार असतील तर कोणतेच लोक सुरक्षीत नाहीत. मला शिव्या दिल्या आहेत. कुत्रा, डुक्कर, तुला मारुन टाकू अशा धमक्या दिल्याचे आव्हाड माध्यमांशी बोलताना म्हणाले. तर मला मारण्यासाठी सगळे आले होते असा आरोप आरोप देखील माध्यमांशी बोलताना आमदार आव्हाड यांनी केला आहे.

संबंधित बातम्या