अहिल्यानगरचे खासदार निलेश लंके यांची प्रकृती अचानक खालावली; पुढील उपचारांसाठी तातडीने पुण्याला रवाना

प्रकृतीत अपेक्षित सुधारणा न झाल्याने डॉक्टरांनी त्यांना पुढील उपचारांसाठी पुण्यात हलविण्याचा निर्णय घेतल्याची माहिती सूत्रांकडून मिळत आहे.

MP Nilesh Lanke’s health suddenly deteriorated : अहिल्यानगर दक्षिणचे खासदार तथा राष्ट्रवादी काँग्रेस शरद पवार पक्षाचे युवा नेते निलेश लंके यांची प्रकृती अचानक बिघडल्याची माहिती समोर आली असून, त्यांना तातडीने पुढील उपचारांसाठी पुण्यातील रुग्णालयात हलविण्यात आल्याने कार्यकर्ते आणि समर्थकांमध्ये चिंतेचे वातावरण निर्माण झाले आहे. गेल्या काही दिवसांपासून त्यांची तब्येत ठीक नसल्याचे सांगितले जात होते. सुरुवातीला त्यांच्यावर अहिल्यानगरमध्ये उपचार सुरू होते, मात्र प्रकृतीत अपेक्षित सुधारणा न झाल्याने डॉक्टरांनी त्यांना पुढील उपचारांसाठी पुण्यात हलविण्याचा निर्णय घेतल्याची माहिती सूत्रांकडून मिळत आहे.

मिळालेल्या माहितीनुसार, खासदार निलेश लंके यांना गेल्या दोन ते चार दिवसांपासून अशक्तपणा आणि अस्वस्थतेचा त्रास जाणवत होता. सततचा दौरा, सार्वजनिक कार्यक्रम, बैठका आणि सामाजिक उपक्रमांमुळे त्यांना पुरेशी विश्रांती मिळत नसल्याचे त्यांच्या निकटवर्तीयांकडून सांगितले जात आहे. नगरमध्ये प्राथमिक उपचार सुरू असतानाच आज अचानक त्यांची प्रकृती अधिक खालावल्याने त्यांना तातडीने पुण्याकडे रवाना करण्यात आले. सध्या त्यांच्यावर तज्ज्ञ डॉक्टरांच्या देखरेखीखाली उपचार सुरू असल्याची माहिती समोर येत आहे.

दरम्यान, खासदार लंके यांच्या प्रकृतीबाबतची बातमी समजताच त्यांच्या समर्थकांमध्ये मोठी चिंता व्यक्त केली जात आहे. अहिल्यानगर जिल्ह्यासह पारनेर, शेवगाव, राहुरी, नेवासा आणि आसपासच्या भागातील कार्यकर्ते सातत्याने त्यांच्या प्रकृतीची माहिती घेत आहेत. अनेक कार्यकर्ते आणि पदाधिकारी पुण्याकडे रवाना होत असल्याचेही समजते आहे. सोशल मीडियावरही लवकर बरे व्हा अशा शुभेच्छांचा वर्षाव होत असून त्यांच्या प्रकृतीसाठी प्रार्थना केल्या जात आहेत.

नारेगावातील फ्लॅटवर पोलिसांचा छापा; TCS प्रकरणातील फरार आरोपी निदा खानला अटक

निलेश लंके हे त्यांच्या आक्रमक शैलीसह सामाजिक बांधिलकीसाठी ओळखले जातात. नुकत्याच झालेल्या महाराष्ट्र दिनानिमित्त ते तामिळनाडूमधील ऐतिहासिक जिंजी किल्ल्यावर गेले होते. आपला मावळा या संस्थेच्या माध्यमातून छत्रपती शिवाजी महाराजांच्या गड-किल्ल्यांच्या संवर्धनासाठी ते सातत्याने मोहीम राबवत आहेत. विशेष म्हणजे, केवळ उपक्रमांची घोषणा न करता स्वतः गडकिल्ल्यांच्या स्वच्छता मोहिमेत सहभागी होऊन काम करणारे नेते म्हणून त्यांची ओळख आहे.

राजकीय जबाबदाऱ्या, मतदारसंघातील सततचे दौरे, सामाजिक उपक्रम आणि व्यस्त दिनचर्या यामुळे त्यांच्या आरोग्यावर परिणाम झाल्याचे त्यांच्या समर्थकांचे म्हणणे आहे. गेल्या काही महिन्यांपासून ते अत्यंत धावपळीच्या जीवनशैलीत काम करत होते. त्यामुळेच अति श्रम आणि थकव्यामुळे त्यांची प्रकृती खालावली असावी, अशीही चर्चा राजकीय वर्तुळात सुरू आहे.

सध्या डॉक्टरांकडून त्यांच्यावर उपचार सुरू असून त्यांच्या प्रकृतीत सुधारणा व्हावी यासाठी समर्थकांकडून प्रार्थना केली जात आहे. दरम्यान, त्यांच्या प्रकृतीबाबत अधिकृत वैद्यकीय बुलेटिन येण्याकडे सर्वांचे लक्ष लागले आहे.

संबंधित बातम्या