ममता बॅनर्जींचा मोठा डाव! नंदिग्राममध्ये काँग्रेसला साथ, या अचानक निर्णयामागंचं गणित काय?
Nandigram By-Election : पक्षाचं मूळ नाव आणि चिन्ह कोणत्या गटाला मिळणार, याबाबत निवडणूक आयोगाचा अंतिम निर्णय अद्याप बाकी आहे.
-
- Written By: ganesh pokale Published:
पश्चिम बंगालच्या माजी मुख्यमंत्री ममता बॅनर्जी (TMC) यांनी नंदिग्राम विधानसभा पोटनिवडणुकीत काँग्रेसचे उमेदवार मिलन प्रधान यांना पाठिंबा जाहीर केला आहे. नंदिग्राममधून आपला गट स्वतंत्र उमेदवार उभा करणार नसल्याचं त्यांनी स्पष्ट केलं. भाजपविरोधातील लढाईत ‘इंडिया’ आघाडीच्या एकजुटीचा संदेश देण्यासाठी हा निर्णय घेतल्याचं बॅनर्जी यांनी सांगितलं. “भाजपला भारतातून दूर करण्यासाठी आम्ही लढण्यास तयार आहोत. आमचा पूर्ण पाठिंबा इंडिया आघाडीला आहे,” असं त्यांनी पत्रकार परिषदेत म्हटलं.
ममता बॅनर्जी यांनी ‘इंडिया’ आघाडीतील इतर नेत्यांशी झालेल्या चर्चेचाही उल्लेख केला. काँग्रेस नेते राहुल गांधी यांनी गुरुवारी आपल्याला फोन केल्याचं त्यांनी सांगितलं. तसेच आम आदमी पक्षाचे नेते अरविंद केजरीवाल यांनीही पाठिंबा दर्शवणारा संदेश दिल्याचं बॅनर्जी यांनी सांगितलं. नंदिग्राममधून ममता गटानं उमेदवार म्हणून दिलेल्या संचिता प्रधान डे यांनी उमेदवारी मागं घेतल्यानंतर काही तासांतच ममता बॅनर्जी यांनी काँग्रेसला पाठिंबा जाहीर केला.
तृणमूल काँग्रेसला मोठा धक्का! नाव-चिन्ह गोठवून ममता गटाला नवी ओळख
संचिता प्रधान डे यांनी 6 ऑक्टोबरच्या पोटनिवडणुकीला अवघा महिनाभर बाकी असताना उमेदवारी मागं घेतली. त्यापूर्वी त्यांनी मुख्यमंत्री सुवेंदू अधिकारी यांची राज्य सचिवालयातील नबन्ना येथे भेट घेतली होती. ही भेट सुरुवातीला सदिच्छा भेट म्हणून सांगण्यात आली होती. मात्र, अधिकारी हे नंदिग्रामचे माजी आमदार आणि ममता बॅनर्जी यांचे प्रमुख राजकीय प्रतिस्पर्धी असल्यामुळे या भेटीची राजकीय चर्चा रंगली.
दरम्यान, ममता बॅनर्जी यांच्या गटासाठी हा दिवस पक्षांतर्गत संघर्षाच्या दृष्टीनंही महत्त्वाचा ठरला. तृणमूल काँग्रेसमधील दोन गटांमधील वादाच्या पार्श्वभूमीवर निवडणूक आयोगानं ‘ऑल इंडिया तृणमूल काँग्रेस’ हे पक्षाचं नाव आणि ‘फुलं आणि गवत’ हे पारंपरिक निवडणूक चिन्ह अंतरिम स्वरूपात गोठवलं आहे. त्यामुळे आगामी पोटनिवडणुकांमध्ये दोन्ही गटांना मूळ नाव आणि चिन्ह वापरता येणार नाही.
या निर्णयानंतर ममता बॅनर्जी यांच्या गटाला ‘ममता ऑल इंडिया तृणमूल काँग्रेस’ हे नाव आणि ‘फुटबॉलपटू’ हे चिन्ह देण्यात आलं आहे. तर प्रतिस्पर्धी गटाला ‘डेमोक्रॅटिक तृणमूल काँग्रेस’ हे नाव आणि ‘लिफाफा’ हे चिन्ह देण्यात आलं आहे. ही नावं आणि चिन्हं 6 ऑक्टोबरच्या पोटनिवडणुकांपुरती लागू असतील. पक्षाचं मूळ नाव आणि चिन्ह कोणत्या गटाला मिळणार, याबाबत निवडणूक आयोगाचा अंतिम निर्णय अद्याप बाकी आहे.
निवडणूक आयोगाच्या निर्णयावर ममता बॅनर्जी यांनी तीव्र प्रतिक्रिया दिली आहे. हा भारताच्या लोकशाहीच्या इतिहासातील ‘काळा दिवस’ असल्याचं सांगत त्यांनी आयोगाच्या निर्णयामागं राजकीय पक्षपात आणि सूडबुद्धी असल्याचा आरोप केला. आपल्या गटाची बँक खाती गोठवण्यात आल्याचा आणि कार्यकर्त्यांना लक्ष्य केलं जात असल्याचाही त्यांनी दावा केला. पोलिस यंत्रणा सत्ताधारी भाजपचा ‘हात’ बनल्याचा आरोप करत पक्षाच्या सुमारे 14,000 कार्यकर्त्यांना तुरुंगात डांबण्यात आल्याचा दावाही त्यांनी केला. तसेच आपल्याला नजरकैदेत ठेवण्यात आलं असून कार्यकर्त्यांना भेटता येत नसल्याचं बॅनर्जी यांनी म्हटलं. हे आरोप ममता बॅनर्जी यांचे दावे आहेत.
