चार राज्यात PM मोदींचा झंझावती प्रचार दौरा, मिझोराममध्ये एकही सभा का घेतली नाही?

Election 2023 : आगामी लोकसभा निवडणुकीपूर्वी पाच राज्यांमध्ये होणाऱ्या विधानसभा निवडणुकीच्या शेवटच्या फेरीत पंतप्रधान नरेंद्र मोदी (Prime Minister Narendra Modi) यांनी सुमारे 40 निवडणूक सभांना संबोधित केले. या काळात त्यांनी काही रोड शोही केले. पीएम मोदींनी मध्य प्रदेशमध्ये सर्वाधिक 14 निवडणूक प्रचारसभांना संबोधित केले. मात्र, पंतप्रधान मोदी ईशान्येकडील राज्य मिझोराममधील (Mizoram Election) कोणत्याही निवडणूक कार्यक्रमाला उपस्थित राहिले नाहीत.

ललित पाटील ड्रग्स प्रकरणात मोठी अपडेट; सुषमा अंधारे यांना नाशिकमधून निनावी पत्र… 

गेल्या महिन्यात ९ ऑक्टोबरला पाच राज्यांतील विधानसभा निवडणुकांच्या तारखा जाहीर झाल्या. मध्य प्रदेश, राजस्थान, मिझोराम आणि छत्तीसगडमध्ये मतदान प्रक्रिया पूर्ण झाली आहे. तेलंगणामध्ये 30 डिसेंबरला मतदान होणार आहे. 3 डिसेंबरला पाच राज्यांतील मतमोजणीनंतर कोणत्या राज्यात कोणाचे सरकार स्थापन होणार आणि कुठे कोणाची जादू चालली, हे स्पष्ट होईल.

पहिली रॅली छत्तीसगडमध्ये

निवडणुकीच्या घोषणेनंतर पंतप्रधानांनी आपली पहिली रॅली छत्तीसगडमध्ये घेतली. यानंतर त्यांनी राज्यातील दुर्ग, मुंगेली, विश्रामपूर, महासमुंद या भागात प्रचारसभ घेऊन मतदारांना आकर्षित केलं. यावेळी त्यांनी काँग्रेसवर तसेच मुख्यमंत्री भूपेश बघेल यांच्यावर निशाणा साधला. त्यांनी काँग्रेसचा भ्रष्टाचार आणि गैरकारभार हा प्रचाराचा मुद्दा बनवला. कांकेरमधील जाहीर सभेला संबोधित केल्यानंतर, पंतप्रधानांनी ‘एक्स’ वर राज्यातील जनतेला एक खुले पत्र देखील शेअर केले आणि त्यांना भाजपच्या बाजूने मतदान करण्याचे आवाहन केले. ‘छत्तीसगड भाजपने निर्माण केले आहे, भाजपच सुधारेल’, असे त्यांच्या पत्रात लिहिले होते.

मणिपूर हिंसाचारात बळी गेलेल्या नागरिकांवर 7 दिवसाच्या आत अंत्यसंस्कार करा; SC चे आदेश 

काँग्रेसशासित छत्तीसगडमधील 90 जागांपैकी 20 जागांसाठी 7 नोव्हेंबरला पहिल्या टप्प्यात मतदान झालं, तर 70 जागांसाठी दुसऱ्या आणि शेवटच्या टप्प्याचं मतदान 17 नोव्हेंबरला संपलं. पहिल्या टप्प्यात 78 टक्के मतदान झाले, तर दुसऱ्या टप्प्यात 75.08 टक्के मतदारांनी मतदानाचा हक्क बजावला. गेल्या निवडणुकीत राज्यात काँग्रेसला 68 जागा मिळाल्या होत्या आणि भाजपला 15 जागा मिळाल्या होत्या. त्या निवडणुकीत जनता काँग्रेस छत्तीसगड (जे)ला पाच तर बसपाला दोन जागा मिळाल्या होत्या. काँग्रेसकडे सध्या 71 आमदार आहेत.

मध्य प्रदेशात किती रॅली काढल्या?

मध्य प्रदेशमध्ये, पंतप्रधानांनी एकूण 14 सार्वजनिक सभांना संबोधित केले आणि इंदूरमध्ये रोड शो केला. या राज्यातील त्यांचा पहिला मेळावा रतलाममध्ये झाला. त्यांनी सिवनी, खंडवा, सिधी, दमोह, गुना, मुरैना, सतना, छतरपूर, नीमच, बरवानी, बैतूल, शाजापूर आणि झाबुआ येथे निवडणूक रॅलींना संबोधित करून राज्याच्या जवळपास सर्व भागात पोहोचण्याचा प्रयत्न केला. मध्य प्रदेशात पंतप्रधानांचा संपूर्ण भर ‘डबल इंजिन’ सरकार आणि राज्याच्या विकासासाठी भाजपची बांधिलकी यावर होता. मध्य प्रदेशात गेल्या विधानसभा निवडणुकीत काँग्रेसला 114 तर भाजपने 109 जागा जिंकल्या होत्या. उर्वरित जागा बसपा, समाजवादी पक्ष आणि अपक्ष उमेदवारांच्या वाट्याला गेल्या. निवडणुकीच्या निकालानंतर बसपा, सपा आणि अपक्षांच्या मदतीने कमलनाथ यांच्या नेतृत्वाखाली सरकार स्थापन करण्यात आले.

तथापि, मार्च 2020 मध्ये ज्योतिरादित्य सिंधिया आणि त्यांच्या जवळच्या आमदारांच्या बंडानंतर काँग्रेसचे सरकार पडले आणि शिवराज सिंह चौहान यांच्या नेतृत्वाखालील भाजप सरकार सत्तेत आले होते. दरम्यान, आता मध्य प्रदेश विधानसभा निवडणुकीत भाजपने दोन केंद्रीय मंत्री आणि पक्षाचे राष्ट्रीय सरचिटणीस कैलाश विजयवर्गीय यांच्यासह सात खासदारांना उभे करून अत्यंत गांभीर्याने निवडणूक लढवत असल्याचे दाखवून दिले होते. मात्र, शिवराज सिंह चौहान यांना पक्षाने मुख्यमंत्रीपदाचा चेहरा म्हणून पुढे केले नाही. याउलट काँग्रेसने कमलनाथ यांचा चेहरा पुढे करून निवडणूक लढवली आहे. मध्य प्रदेशातील विधानसभेच्या 230 जागांसाठी 17 नोव्हेंबरला एकाच टप्प्यात मतदान झाले.

पीएम मोदींनी राजस्थानला किती वेळा भेट दिली?

काँग्रेसशासित राजस्थानमध्ये पंतप्रधानांनी एकूण 12 जाहीर सभांना संबोधित केले आणि त्यादरम्यान त्यांनी गुन्हेगारी आणि भ्रष्टाचार हा मुद्दा बनवून काँग्रेस आणि मुख्यमंत्री अशोक गेहलोत यांच्यावर निशाणा साधला. निवडणूक रॅलींच्या शेवटच्या फेरीत पंतप्रधानांनी उदयपूरचे कन्हैयालाल खून प्रकरण आणि तत्कालीन काँग्रेस नेतृत्वाने दिवंगत नेते राजेश पायलट यांना दिलेली वागणूक यावर जोरदारपणे आवाज उठवला. राजस्थानमध्ये दर पाच वर्षांनी सरकार बदलते. गेहलोत यांच्या नेतृत्वाखाली काँग्रेसने ही परंपरा बदलण्यासाठी सर्वतोपरी प्रयत्न केले, तर भाजपने मोदींच्या तोंडावर निवडणुका लढवून पुढील वर्षी होणाऱ्या लोकसभा निवडणुकीपूर्वी राज्यात पुन्हा सत्तेत येण्यासाठी सर्वतोपरी प्रयत्न केले. पंतप्रधानांनी जयपूर आणि बिकानेरमध्ये दोन रोड शोही केले. राज्यातील 200 जागांसाठी 25 नोव्हेंबर रोजी मतदान झाले.

पीएम मोदींनी तेलंगणाला किती वेळा भेट दिली?

पंतप्रधानांनी तेलंगणात एकूण आठ निवडणूक रॅलींना संबोधित केले आणि हैदराबादमध्ये रोड शो केला. तेलंगणामध्ये, मुख्यमंत्री के चंद्रशेखर राव (KCR) यांच्या नेतृत्वाखालील भारत राष्ट्र समिती आणि काँग्रेस यांच्यात थेट लढत आहे, परंतु भाजप देखील मजबूत शक्ती म्हणून उदयास येण्यासाठी जोरदारपणे निवडणूक लढवत आहे. येथील निवडणुकीत मुख्यमंत्री केसीआर यांच्यासह पंतप्रधानांनी काँग्रेसवर हल्लाबोल करत राज्यात ‘डबल इंजिन’ सरकारचा पुरस्कार केला. 90 सदस्यीय तेलंगणा विधानसभेसाठी 30 नोव्हेंबर रोजी मतदान होणार आहे.

पंतप्रधान मोदी मिझोरामला गेले नाहीत

40 सदस्यीय मिझोरम विधानसभेसाठी 7 नोव्हेंबर रोजी मतदान पूर्ण झाले. या ईशान्येकडील राज्यात पंतप्रधानांनी एकही निवडणूक रॅली काढली नाही किंवा रोड शो वा अन्य कार्यक्रमही केला नाही. मिझोराममध्ये सत्ताधारी मिझो नॅशनल फ्रंट आणि प्रमुख विरोधी पक्ष झोरम पीपल्स मूव्हमेंट यांच्यात लढत आहे. काँग्रेसने सर्व 40 जागांवर, भाजपने 23 आणि आम आदमी पक्षाने चार जागांवर उमेदवार उभे केले आहेत.

मिझोरम विधानसभा निवडणुकीच्या एक दिवस आधी काँग्रेसने सोमवारी पंतप्रधान नरेंद्र मोदींवर हल्लाबोल केला. पंतप्रधान मोदींनी मणिपूरला भेट दिली नसल्यामुळे, ‘टीकेच्या भीतीने’ ईशान्येकडील राज्याला भेट देण्याचे धाडस त्यांच्यात नव्हते, असा दावा विरोधी पक्षाने केला आहे.

संबंधित बातम्या