‘अजित पवार कमळाच्या तिकीटावरच निवडणूक लढवणार’; वडेट्टीवारांनी खात्रीशीर सांगितलं

उपमुख्यमंत्री अजित पवार यांनी दुपारी शरद पवार यांची भेट घेतली. संध्याकाळी लगेचच दिल्लीमध्ये धाव घेत केंद्रीय गृहमंत्री अमित शाहा यांना दिवाळीनिमित्त शुभेच्छा दिल्या आहेत. गेले काही दिवस अजितदादा डेंग्यूमुळे आजारी होते. मात्र आज धनत्रयोदशीच्या दिवशी ते सार्वजनिक फोटोमध्ये दिसले. अजितदादांनी आपल्या आजच्या कृतीमधून भाजपच्या मनातील गोंधळ दूर करण्याचा तर प्रयत्न केला नाही ना? अशी चर्चा सध्या राजकीय वर्तुळात रंगू लागली.

दिवाळीनिमित्त पवार कुटुंबातील सर्व सदस्य एकत्र येऊन हा सण उत्साहात आणि जोरात साजरा करतात अशी अनेक वर्षांची परंपरा आहे. यानिमित्त पवार कुटुंबियात पुन्हा मनोमिलन तर होणार नाही ना? अशीही शंका अनेकांच्या मनामध्ये येऊन गेली आहे. या शंकेचे निरसन करण्यासाठीच अजित पवारांनी आधीच ‘प्लॅन बी’ आखला होता की काय? असं या भेटीतून दिसून आलं .

शरद पवार यांचे बंधू आणि ज्येष्ठ उद्योजक प्रतापराव पवार यांच्याकडे पवार कुटुंबाचा आजच्या दिवसातला दिवाळीतील पहिला कार्यक्रम पुण्यामध्ये पार पडला. या कार्यक्रमाला शरद पवार यांच्यासह अजित पवार, सुप्रिया सुळे यांनी हजेरी लावली होती. अजितदादा बारामतीत नेहमीप्रमाणे होणाऱ्या पवार कुटुंबीयांच्या कार्यक्रमाला उपस्थित राहणार नाहीत मात्र, आजच्या पहिल्या कार्यक्रमाला हजेरी लावत त्यांनी पवार कुटुंबातील इतर सदस्यांची मने राखली.

दरम्यान, सत्ताधारी आणि विरोधकांमध्ये टीकांची बरसात सुरु असतानाच आता विजय वडेट्टीवारांनी अजित पवारांबद्दल हा दावा केला आहे. वडेट्टीवारांच्या या दाव्यावरुन आता अजित पवारांसह गटातीले नेते नेमकं काय बोलणार?’ हे पाहणं महत्वाचं ठरणार आहे.