‘तुका म्हणे ऐशा नरा, मोजुनी माराव्या पैजारा!, अजित गव्हाणेंच्या ‘कॅलिबर’ वक्तव्यानंतर वारकरी संप्रदाय आक्रमक

पिंपरी : जगद्गुरू संत तुकाराम महाराज (Tukaram Maharaj) संतपीठ पिंपरी-चिंचवडमधील ऐतिहासिक टाळगाव चिखलीत उभारण्यात आले. या संतपीठावरुन नवा वाद निर्माण झाला आहे. किंबहुना, संतपीठावरील संचालकांच्या पात्रतेवर महाविकास आघाडीचे (Mahavikas Aghadi) उमेदवार अजित गव्हाणे (Ajit Gavane) यांनी जाहीर सभेत प्रश्नचिन्ह निर्माण केले. त्यावर आता ‘‘तुका म्हणे ऐशा नरा… मोजुनी माराव्या पैजारा..’’ अशा संतप्त प्रतिक्रिया वारकरी संप्रदायातून उमटू लागल्यात.

PM Narendra Modi : काँग्रेस, संविधान अन् जम्मू काश्मीर नरेंद्र मोदींनी नांदेडमध्ये सभा गाजवली 

महाविकास आघाडी विरुद्ध महायुती अशी थेट लढत पिंपरी-चिंचवडमध्ये सुरू आहे. पिंपरी, चिंचवड आणि भोसरी अशा तीनही जागांवर महाविकास आघाडीतील राष्ट्रवादी शरद पवार पक्षाकडून उमेदवार रिंगणात उतरले आहेत. भोसरीतून अजित गव्हाणे, पिंपरीतून सुलक्षणा शिलवंत आणि चिंचवडमध्ये राहुल कलाटे निवडणुकीच्या ‘तुतारी’च्या चिन्हावर रिंगणात आहेत.

अजित गव्हाणे काय म्हणाले?
भोसरीतील एका सभेमध्ये अजित गव्हाणे यांनी विद्यमान आमदार आणि महायुतीचे उमदेवार महेश लांडगे यांना संतपीठाच्या मुद्यावरून लक्ष्य केले. ‘संतपीठावर ज्यांना संचालक केले आहे, त्यांचा इतिहास चेक करा, त्यांचे कॅलिबर तुमच्या लक्षात येईल’ असा गंभीर आरोप गव्हाणे यांनी केला. त्यामुळे वारकरी सांप्रदाय आणि शिक्षण क्षेत्रात उलटसुलट चर्चा सुरू झाली. विशेष म्हणजे, आज घडीला या संतपीठामध्ये १ हजार ६०० हून अधिक विद्यार्थी संतसाहित्य आणि आधुनिक शिक्षणाचे धडे गिरवत आहेत. त्यामुळे त्यांच्या पालकांमध्येही संभ्रम निर्माण झाला.

गव्हाणे तुकोबारायांच्या वंशजांचे कॅलिबर तपासणार का?
वास्तविक, संतपीठाचे पदसिद्ध अध्यक्ष व मुख्य संचालक महानगरपालिका आयुक्त शेखर सिंह आहेत. पिंपरी-चिंचवड महानगरपालिकाच संतपीठाचे संचालन करते. यासह संतपीठावर महाराष्ट्र राज्य साहित्य व संस्कृती महामंडळाचे अध्यक्ष आणि जगद्गुरू संत तुकाराम महाराज यांचे वंशज, संतसाहित्याचे गाढे अभ्यासक प्रा. डॉ. सदानंद मोरे (देहुकर), आळंदी देवस्थान ट्रस्टचे माजी सदस्य, शिक्षणक्षेत्रातील तज्ञ आणि संपादक, लेखक, अर्थतज्ञ असा लौकीक असलेले डॉ. अभय टिळक यांचा संतपीठाच्या संचालक मंडळामध्ये समावेश आहे. त्यामुळे अजित गव्हाणे आता तुकोबारायांचे वंशज, आयएएस दर्जाच्या अधिकाऱ्यांचे ‘कॅलिबर’ म्हणजे पात्रता तपासणार आहेत का? असा संतप्त सवाल उपस्थित केला जात आहे.

गरिबांचा पैसा गरिबांना दिला तर भाजपला पोटदुखी का? कॉंग्रेसचा थेट सवाल…

किंबहुना, संतपीठ ही मूळ संकल्पना स्व. दत्ता साने यांची आहे. त्या संकल्पनेला मूर्तरुप आमदार महेश लांडगे यांनी दिले. संतपाठीच्या प्रस्तावापासून सल्लागार नियुक्ती, निविदा प्रक्रिया, वर्क ऑर्डर, भूमिपूजन आणि लोकार्पण आणि आता संतपीठाचे यशस्वीपणे संचालन सुरू आहे. मात्र, अजित गव्हाणे यांच्यासारख्या सुसंस्कृत आणि अभ्यासू नेता चुकीच्या माहितीच्या आधारे आक्षेपार्ह वक्तव्य केले. ‘‘तुका म्हणे ऐशा नरा… मोजुनी माराव्या पैजारा..’’ अशा संतप्त प्रतिक्रिया वारकरी सांप्रदाय आणि शिक्षण क्षेत्रातून येत आहेत. त्यामुळे संतपीठाच्या मुद्यावर गव्हाणेंचा ‘सेल्फ गोल’ झाला, असे निरीक्षण राजकीय जाणकारांनी नोंदवले आहे.

बोला रामकृष्ण हरी, तुतारीला पाठवा घरी : हभप दत्ताआबा गाकवाड
दिघी येथील भाजप नेत्या पंकजा मुंडे यांच्या उपस्थितीमध्ये दिघीतील ज्येष्ठ नेते आणि वारकरी संप्रदायाचे ह.भ.प. दत्ताआबा गायकवाड यांनी दिघीच्या विकासाच्या मुद्यावर राष्ट्रवादी शरद पवार पक्षावर प्रहार करतानाच ‘‘रामकृष्ण हरी’’ म्हणण्याचा नैतिक अधिकार तुम्हाला नाही, असे खडे बोल जाहीर सभेत सुनावले.

ते म्हणाले, जो पक्ष आणि त्यांचा नेता रामाला, कृष्णाला, आमच्या देव-देवतांना मानत नाही. आमच्या स्वामी समर्थांचा, आमच्या गजानन महाराजांचा अवमान केला जातो. त्याबद्दल अवाक्षर न काढणाऱ्यांच्या तोंडी रामकृष्ण हरी शोभत नाही म्हणून बोला रामकृष्ण हरी… तुतारीला आता पाठवा घरी’ अशी भूमिका त्यांनी घेतली.

वारकरी संप्रदाय कदापि महाविकास आघाडीसोबत राहणार नाही. कारण, भले त्यासी देवू कासेची लंगोटी, नाठाळाच्या माथी हाणू काठी. ही संत तुकोबारायांची शिकवण आहे, अशी प्रतिक्रिया दत्ताआबा गायकवाड यांनी दिली.

संबंधित बातम्या