“संबंध सिद्ध करा, एका मिनिटात राजकारण सोडेन”; दिलीप वळसे पाटील यांचे विरोधकांना खुले आव्हान

Dilip Walse Patil Slams Opposition Over Allegations दूध भेसळ प्रकरणातील आरोपांवर राष्ट्रवादी काँग्रेसचे नेते दिलीप वळसे पाटील आक्रमक झाले आहेत. म्हणाले "संबंध सिद्ध झाला तर एका मिनिटात राजकारण सोडेन,"

Dilip Walse Patil Slams Opposition Over Allegations: राज्यात दूध भेसळ प्रकरणावरून (Milk Adulteration Case) सुरू असलेल्या कारवाईच्या पार्श्वभूमीवर राष्ट्रवादी काँग्रेसचे ज्येष्ठ नेते आणि माजी मंत्री,आमदार दिलीप वळसे पाटील (Dilip Walse Patil) यांनी विरोधकांवर जोरदार पलटवार करत मोठे वक्तव्य केले आहे. “जर दूध भेसळ किंवा कोणत्याही बेकायदेशीर प्रकरणात माझा थेट किंवा अप्रत्यक्ष संबंध सिद्ध झाला, तर एका मिनिटाचाही विलंब न करता सार्वजनिक जीवनातून कायमचा सन्यास घेईन,” असे त्यांनी ठामपणे सांगितले. त्यांच्या या विधानामुळे राज्याच्या राजकीय वर्तुळात नव्या चर्चांना सुरुवात झाली आहे.

राज्यभर दूध भेसळीविरोधात कारवाई

अन्न व औषध प्रशासनाने (FDA) राज्यभर दूध भेसळ रोखण्यासाठी विशेष मोहीम हाती घेतली आहे. या मोहिमेत विविध जिल्ह्यांमध्ये दूध संकलन केंद्रे, डेअऱ्या आणि दूध प्रक्रिया युनिट्सवर छापेमारी करण्यात आली. पुणे जिल्ह्यातील आंबेगाव तालुक्यातही अशाच प्रकारची कारवाई करण्यात आली. या कारवाईनंतर काही राजकीय विरोधकांनी आंबेगावातील दूध भेसळ प्रकरणामागे दिलीप वळसे पाटील यांचा हात असल्याचा आरोप केला. सोशल मीडियावर तसेच काही माध्यमांमधून त्यांचे नाव या प्रकरणाशी जोडण्याचा प्रयत्न झाल्याचा आरोप वळसे पाटील यांनी केला आहे.

IND vs SL : फक्त तीन दिवसांचा सामना; श्रीलंका दौऱ्यासाठी भारतीय संघाच्या वेळापत्रकात बदल

“संबंध सिद्ध झाला तर कायमचा सन्यास घेईन”

या आरोपांना उत्तर देताना वळसे पाटील यांनी अत्यंत स्पष्ट भूमिका मांडली. ते म्हणाले, “जर दूध भेसळ किंवा कोणत्याही बेकायदेशीर प्रकरणात माझा संबंध सिद्ध झाला, तर मी एका मिनिटाचाही विलंब न करता सार्वजनिक जीवनातून कायमचा सन्यास घेईन.” या वक्तव्यामुळे विरोधकांनाही त्यांनी थेट आव्हान दिले असून, आरोप करणाऱ्यांनी पुरावे सादर करावेत, असा अप्रत्यक्ष संदेश त्यांनी दिला.

“कोणत्याही भेसळ करणाऱ्याच्या पाठीशी उभा राहणार नाही”

वळसे पाटील यांनी दूध भेसळ करणाऱ्यांबाबतही कठोर भूमिका व्यक्त केली. ते म्हणाले, “भेसळ करणारी व्यक्ती कोणतीही असो किंवा कोणतीही कंपनी असो, मी कोणत्याही बेकायदेशीर घटकाच्या कधीही पाठीशी उभा राहणार नाही. कायद्यापुढे सर्व समान आहेत आणि दोषींवर कठोर कारवाई झालीच पाहिजे.”

दूध भेसळीच्या रॅकेटमुळे वळसे पाटील बॅकफूटवर गेलेत का ?

“माझी जाणीवपूर्वक बदनामी केली जात आहे”

राजकीय विरोधकांवर निशाणा साधताना वळसे पाटील म्हणाले की, दूध भेसळ प्रकरणाच्या निमित्ताने काही जण जाणीवपूर्वक त्यांचे नाव या प्रकरणात गोवून त्यांची प्रतिमा मलीन करण्याचा प्रयत्न करत आहेत. हे राजकीय षडयंत्र असल्याचा आरोपही त्यांनी केला.

अब्रूनुकसानीच्या दाव्याचा इशारा

आरोपांचा सूर कायम राहिल्यास कायदेशीर कारवाईचा इशारा देत वळसे पाटील म्हणाले, “राजकीय षडयंत्र रचून माझ्यावर होत असलेली चिखलफेक तात्काळ थांबवावी. अन्यथा संबंधित व्यक्तींविरोधात कोट्यावधींचा अब्रूनुकसानीचा दावा दाखल केला जाईल. शेवटी विजय सत्याचाच होतो.” त्यांच्या या इशाऱ्यामुळे या प्रकरणाला आता कायदेशीर वळण लागण्याची शक्यता व्यक्त केली जात आहे.

मोदींच्या विद्यार्थ्यांना माफ करा आवाहनावर अभिजीत दिपकेंचा सवाल; फक्त रीलवर माफी की गुन्हेही मागे घेणार?

पुढे काय होणार?

दिलीप वळसे पाटील यांनी अत्यंत ठाम भूमिका घेत विरोधकांना पुरावे सादर करण्याचे अप्रत्यक्ष आव्हान दिले आहे. दुसरीकडे, बदनामी केल्याचा आरोप करत त्यांनी अब्रूनुकसानीच्या दाव्याचाही इशारा दिल्याने हे प्रकरण आणखी चिघळण्याची शक्यता आहे. आता विरोधक त्यांच्या आरोपांवर ठाम राहतात की पुरावे सादर करतात, तसेच वळसे पाटील प्रत्यक्षात कायदेशीर कारवाई करतात का, याकडे राज्याच्या राजकीय वर्तुळाचे लक्ष लागले आहे.

देशावर प्रेम असेल तर दुबईत का राहता? विवेक ओबेरॉय आणि आर. माधवन यांना राज ठाकरेंचा प्रश्न

संबंधित बातम्या