NEET पेपरफुटी प्रकरणात मोठी कारवाई! सर्व 14 आरोपींविरोधात आरोप निश्चित, महाराष्ट्रातील चहाविक्रेत्याचाही समावेश
NEET UG 2026 Paper Leak Case : NEET पेपरफुटी प्रकरणात दिल्ली न्यायालयाने सर्व 14 आरोपींविरोधात आरोप निश्चित केले.
NEET UG 2026 Paper Leak Case : NEET-UG 2026 पेपरफुटी प्रकरणात (Delhi) दिल्लीतील विशेष न्यायालयाने मोठी कारवाई केली आहे. या प्रकरणातील सर्व 14 आरोपींविरोधात शनिवारी (November 21) आरोप निश्चित करण्यात आले. राऊस अव्हेन्यू न्यायालयातील विशेष न्यायाधीश अजय गुप्ता यांच्यासमोर आरोपींना हजर करण्यात आले होते. न्यायालयाने आरोप वाचून दाखवल्यानंतर सर्व आरोपींनी गुन्हा केल्याचे नाकारले. तसेच आपल्यावरील आरोप मान्य नसल्याचे सांगत न्यायालयीन खटल्याला सामोरे जाण्याची तयारी दर्शवली.
वैद्यकीय प्रवेशासाठी घेण्यात येणाऱ्या NEET-UG 2026 परीक्षेवर पेपरफुटीच्या आरोपांमुळे मोठे संकट ओढवले होते. May 3 रोजी देशभरात ही परीक्षा पार पडली होती. देशातील सुमारे 22 लाख विद्यार्थ्यांनी या परीक्षेला हजेरी लावली होती. मात्र, प्रश्नपत्रिका फुटल्याचा प्रकार समोर आल्यानंतर राष्ट्रीय परीक्षा संस्थेने (NTA) May 12 रोजी परीक्षा रद्द करण्याचा निर्णय घेतला. त्यानंतर विद्यार्थ्यांचे शैक्षणिक नुकसान टाळण्यासाठी June 21 रोजी फेरपरीक्षा घेण्यात आली.
पेपरफुटीच्या या गंभीर प्रकरणाचा तपास केंद्रीय अन्वेषण विभागाकडे (CBI) सोपवण्यात आला होता. तपासादरम्यान प्रश्नपत्रिका फुटीच्या कथित कटात सहभागी असलेल्या अनेक व्यक्तींची नावे समोर आली. November 18 रोजी विशेष न्यायालयाने 14 आरोपींविरोधात आरोप निश्चित करण्याचे आदेश दिले होते. त्यानुसार शनिवारी न्यायालयात आरोप निश्चित करण्याची प्रक्रिया पूर्ण झाली. आरोपींवर गुन्हेगारी कट, फसवणूक, विश्वासघात आणि पुरावे नष्ट करण्यासारखे गंभीर आरोप ठेवण्यात आले आहेत.
या प्रकरणात आरोपींविरोधात केवळ फसवणुकीचेच नव्हे, तर भ्रष्टाचार प्रतिबंधक कायद्यांतर्गतही आरोप निश्चित करण्यात आले आहेत. याशिवाय सार्वजनिक परीक्षा (अनुचित मार्गांना प्रतिबंध) कायदा, 2024 मधील तरतुदींनुसारही कारवाई करण्यात आली आहे. प्रश्नपत्रिका फुटीच्या माध्यमातून विद्यार्थ्यांच्या भविष्याशी खेळ झाल्याचा आरोप असून, या संपूर्ण नेटवर्कमधील प्रत्येकाची भूमिका तपासण्यावर CBI चा भर आहे.
तपास यंत्रणेने या प्रकरणात दोन स्वतंत्र आरोपपत्रे न्यायालयात दाखल केली आहेत. July 28 रोजी दाखल झालेल्या पहिल्या आरोपपत्रात 13 जणांची नावे समाविष्ट करण्यात आली होती. यामध्ये राष्ट्रीय परीक्षा संस्थेशी संबंधित तीन विषयतज्ज्ञ, कोचिंग क्षेत्रातील दोन व्यक्ती आणि प्रश्नपत्रिका फुटीच्या कथित कटातील मध्यस्थांचा समावेश आहे. जीवशास्त्र विषयाच्या मनीषा गुरुनाथ मांढरे, रसायनशास्त्र विषयाचे प्रल्हाद विठ्ठलराव कुलकर्णी आणि भौतिकशास्त्र विषयाच्या मनीषा संजय हवालदार यांची नावेही या आरोपपत्रात आहेत.
यानंतर CBI ने October 14 रोजी पुरवणी आरोपपत्र दाखल करून आणखी एका आरोपीचे नाव समाविष्ट केले. महाराष्ट्रातील चहाविक्रेते शेषराव बजरंग सूर्यवंशी ऊर्फ राज सूर्यवंशी यांना या प्रकरणात आरोपी करण्यात आले. त्यांच्या समावेशामुळे एकूण आरोपींची संख्या 14 झाली आहे. एका चहाविक्रेत्याचे नाव देशातील सर्वात मोठ्या वैद्यकीय प्रवेश परीक्षेच्या पेपरफुटी प्रकरणात आल्याने महाराष्ट्रातही या प्रकरणाची चर्चा सुरू झाली आहे.
आरोपींविरोधात खटला चालवण्यासाठी CBI ने मोठ्या प्रमाणात पुरावे जमा केले आहेत. तपास यंत्रणेने न्यायालयासमोर 360 साक्षीदारांचे जबाब, 422 कागदपत्रे आणि 43 भौतिक पुरावे सादर केले आहेत. या पुराव्यांच्या आधारे प्रश्नपत्रिका फुटीचा कट नेमका कसा रचण्यात आला, त्यासाठी कोणत्या व्यक्तींनी मदत केली आणि या संपूर्ण प्रकरणात प्रत्येक आरोपीची भूमिका काय होती, हे सिद्ध करण्याचा CBI चा प्रयत्न असणार आहे.
विशेष म्हणजे, या प्रकरणात अद्याप कोणत्याही सरकारी अधिकाऱ्याला किंवा राष्ट्रीय परीक्षा संस्थेच्या पदाधिकाऱ्याला आरोपी करण्यात आलेले नाही. खासगी व्यक्ती आणि विषयतज्ज्ञांच्या नेटवर्कच्या माध्यमातून प्रश्नपत्रिका फुटीचा कट रचण्यात आल्याचा दावा CBI ने केला आहे. आता न्यायालयाने सर्व 14 आरोपींविरोधात आरोप निश्चित केल्याने खटल्याच्या पुढील प्रक्रियेला सुरुवात होणार आहे. त्यामुळे या प्रकरणातील पुरावे, साक्षीदारांचे जबाब आणि आरोपींच्या भूमिकेवर न्यायालयात काय निष्पन्न होते, याकडे देशभरातील विद्यार्थ्यांचे आणि पालकांचे लक्ष लागले आहे.