मंत्री अन् आमदारांच्या रोजच्या प्रकरणांनी शिंदे बेजार; बैठक बोलावून सक्त निर्देश देत टोचले कान

Shiv Sena Shinde Group Meeting : शिवसेना शिंदे गटाचे नेते गेल्या काही दिवसांमध्ये कायम वादाच्या केंद्रस्थानी आहेत. (Eknath Shind) अनेक वादग्रस्त व्हिडीओ समोर आले आहेत. दरम्यान या सर्व घटनांनंतर आता उपमुख्यमंत्री एकनाथ शिंदे हे अ‍ॅक्शन मोडमध्ये आल्याचं पाहायला मिळत आहे. शिवसेनेच्या वादग्रस्त मंत्री आणि आमदारांना एकनाथ शिंदे यांनी चांगलंच सुनावलं आहे.

समाज माध्यमांवर अनेक व्हिडिओ व्हायरल झाले आहेत. शिवसेनेचे नेते संजय गायकवाड यांनी जेवण खराब दिल्याचा आरोप करत आकाशवाणी आमदार निवास येथील कॅन्टीनमधल्या कर्मचाऱ्याला मारहाण केली होती, त्यांचा व्हिडीओ समोर आल्यानंतर विरोधकांनी टीकेची झोड उठवली, हे प्रकरण ताजं असतानाच शिवसेनेचे मंत्री संजय शिरसाट यांचा बॅगेसोबतचा एक व्हिडीओ समोर आला, त्या बॅगेमध्ये रोकड असल्याचा आरोप सुरू आहे. त्यावरून राजकारण तापलं आहे.

विट्स हॉटेल ते पैशांनी भरलेली बॅग; संजय शिरसाट अन् भानगडींचा इतिहास एकदा वाचाच

गेल्या काही दिवसांत काही गोष्टी घडल्या, तुमच्याकडे दाखवलेलं बोट माझ्याकडे असतं. तुमचे आमदार काय करतात? असा प्रश्न मला विचारला जातो. तुम्ही सगळी माझी माणसं आहात. आपलं कुटुंब एक आहे. तुमची बदनामी म्हणजे माझी बदनामी आहे. चुकीच्या गोष्टींवर एनर्जी वाया घालवू नका. कमी बोला जास्त काम करा, बदनामीमुळे काही मंत्र्यांना घरी जावं लागलं, असं म्हणत यावेळी एकनाथ शिंदे यांनी आपल्या आमदार आणि मंत्र्यांना अप्रत्यक्ष इशाराही दिला आहे.

त्यासोबतच आपल्या परिवारावर कारवाईचा बडगा उगारायला मला अजिबात आवडणार नाही. परंतु, मला कारवाई करावी लागणार नाही. तसंच, काम तुमच्याकडून अपेक्षित आहे. मी रागावत नाही. मी प्रमुख असल्यासारखं वागत नाही. कार्यकर्त्यासारखं वागतो. तुम्हीही तसंच वागा. आपल्या डोक्यात हवा जाऊ देता कामा नये. कितीही पदं मिळाली तरी कार्यकर्ता आहे, असंच समजून कामं करा. कमी वेळात जास्त यश मिळालंय. लोकं आपल्या पाठीशी आहे. त्यामुळे बदनामीचे डाव रचले जात आहेत. पुढील काळ कसोटीचा आहे असं म्हणत अनेक गोष्टींवर शिंदेंनी आमदारांचे कान टोचले आहेत.

संबंधित बातम्या