राष्ट्रवादीला धक्का! ज्येष्ठ नेते नवाब मलिक यांच्या घरातील व्यक्तीच नगरसेवक पद रद्द

जात पडताळणी समितीने त्यांचे ओबीसी जात प्रमाणपत्र अवैध ठरवल्यानंतर ही कारवाई करण्यात आली.

मुंबईतील प्रभाग क्रमांक 170 मधील नगरसेविका (BMC) बुशरा नदीम मलिक यांचं नगरसेवक पद रद्द झाले आहे. बुशरा या राष्ट्रवादी अजित पवार पक्षाचे ज्येष्ठ नेते नवाब मलिक यांची पुतणी असून कप्तान मलिक यांची मुलगी आहे. आतापर्यंत एकूण 4 नगरसेवकांचं पद रद्द करण्यात आलं आहे. एक ठाकरे सेना, एका राष्ट्रवादी आणि दोन MIM चे नगरसेवकांचं पद रद्द करण्यात आलं आहे.

बुशरा मलिक यांची सदस्यता नेमक्या कोणत्या कारणामुळे रद्द करण्यात आली, याची माहिती जात पडताळणी समितीचा सविस्तर अहवाल प्राप्त झाल्यानंतर स्पष्ट होणार आहे. सध्या कागदपत्र पडताळणीसंदर्भातील एकूण 89 प्रकरणे प्रलंबित असून, त्यापैकी 19 प्रकरणे जात प्रमाणपत्राशी संबंधित आहेत. बृहन्मुंबई महानगरपालिकेने गोवंडी येथील प्रभाग क्रमांक 138 मधून निवडून आलेल्या AIMIMच्या नगरसेविका रोशन शेख यांची सदस्यता रद्द केली आहे.

जात पडताळणी समितीने त्यांचे ओबीसी जात प्रमाणपत्र अवैध ठरवल्यानंतर ही कारवाई करण्यात आली. महापालिकेने जारी केलेल्या अधिसूचनेनुसार, परभणी जिल्हा जात प्रमाणपत्र पडताळणी समितीने 27 एप्रिल 2026 रोजी रोशन शेख यांचे ओबीसी प्रमाणपत्र अवैध ठरवले. हे प्रमाणपत्र नोव्हेंबर 2025 मध्ये जारी करण्यात आलं होतं. रोशन शेख यांनी 2026 च्या बीएमसी निवडणुकीत ओबीसी आरक्षित जागेवरून विजय मिळवला होता. मात्र, जात प्रमाणपत्र अवैध ठरल्यानंतर मुंबई महानगरपालिका अधिनियम, 1888 च्या कलम 16(1C)(a) अंतर्गत त्यांची सदस्यता आपोआप रद्द करण्यात आली.

अधिसूचनेनुसार, 27 एप्रिल 2026 पासूनच त्यांची सदस्यता संपुष्टात आले आहे.
समोर आलेल्या माहितीनुसार याआधी AIMIM चे नगरसेवक शमीर रमजान पटेल यांना ओबीसी जात प्रमाणपत्र अवैध ठरल्यामुळे सदस्यत्व गमवावे लागले होते. जिल्हा जात पडताळणी समितीने त्यांचे प्रमाणपत्र अवैध घोषित केल्यानंतर बीएमसीच्या सर्वसाधारण सभेत महापौर ऋतु तावडे यांनी ते आता नगरसेवक राहिले नसल्याची घोषणा केली होती.

शमीर पटेल हे गोवंडीतील प्रभाग क्रमांक 137 मधून ओबीसी आरक्षित जागेवर निवडून आले होते. यापूर्वी शिवसेना (उद्धव बाळासाहेब ठाकरे) गटाचे नगरसेवक दीपक सावंत यांचीही याच कारणामुळे सदस्यता रद्द करण्यात आली होती. दीपक सावंत हे भांडुपच्या एस विभागातील प्रभाग क्रमांक 111 मधून ओबीसी आरक्षित जागेवर निवडून आले होते. मात्र काही महिन्यांमध्येच त्यांना पद गमवावे लागले आहे.

संबंधित बातम्या