live now
LIVE : विकसित भारताचे स्वप्न 2047 पर्यंत नक्कीच पूर्ण होऊ शकते; PM मोदींनी व्यक्त केला विश्वास
- Written By: Mukund Bhalerao Published:
PM Narendra Modi Independence Day Speech 2024 : आज देशभरात स्वातंत्र्यदिन मोठ्या उत्साहात साजरा केला जात आहे. देशाचे पंतप्रधान नरेंद्र मोदी (PM Narendra Modi) यांनी देशवासियांना संबोधित केले. मोदी म्हणाले, देशातील नागरिकांसाठी आम्ही दीड हजारांपेक्षा जास्त कायदे रद्द केले. यामुळे लोकांचे जीवन अधिक सुसह्य झाले. किरकोळ गोष्टींसाठी सुद्धा कारावासाची शिक्षा असणारे कायदे रद्द करण्यात आले. अपराधिक कायदे बदलण्यात आले.
आता मी सगळ्याच राजकीय पक्षांच्या नेत्यांना आवाहन करतो की त्यांनी आमच्या इज ऑफ लिविंग मिशनमध्ये सहभागी व्हावे. सन 2047 पर्यंत भारताला विकसित राष्ट्र बनविण्यासाठी आम्ही शिफारसी मागितल्या आहेत. काही लोकांनी भारताला कौशल्य राजधानी बनविण्याची सूचना केली आहे. काही लोकांनी देश आत्मनिर्भर व्हावा यावर भर दिला. शासन आणि न्याय प्रणालीत सुधारणा, ग्रीनफिल्ड शहरांचे निर्माण, भारताचे स्वतःचे स्पेस स्टेशन अशा अनेक आशा भारतीय नागरिकांच्या आहेत, असे नरेंद्र मोदी म्हणाले.
दहा वर्षांत रस्ते अन् रुग्णालयांचे जाळे
मागील दहा वर्षांच्या काळात देशात रस्ते, रेल्वे, महामार्ग, स्कूल कॉलेज, रुग्णालये, मेडिकल कॉलेज, अमृत सरोवर, दोन लाख ग्रामपंचायतीत ऑप्टिकल फायबर, चार कोटी पक्की घरे अशा सुविधा निर्माण करण्यात आल्या.
मेडिकलच्या 75 हजार जागा आणखी वाढणार
वैद्यकिय शिक्षणासाठी देशातील विद्यार्थ्यांना दुसऱ्या देशात जावे लागत आहे. दहा वर्षांच्या काळात मेडिकल जागांची संख्या एक लाख झाली आहे. आगामी पाच वर्षांच्या काळात देशातील वैद्यकिय महाविद्यालयांत आणखी 75 हजार नवीन जागा उपलब्ध करून देण्यात येतील.
LIVE NEWS & UPDATES
-
घराणेशाहीचं राजकारण नष्ट करण्याचं ध्येय
पीएम मोदी म्हणाले घराणेशाही आणि जातीवादाच्या राजकारणामुळे देशाच्या लोकशाहीलाच धोका निर्माण झाला आहे. या धोकादायक गोष्टींपासून देशाला मुक्ती देणे काळाची गरज आहे. कोणतीही राजकीय पार्श्वभूमी नसणारे किमान एक लाख लोक पुढे आणण्याचे आमचे उद्दीष्ट आहे. यामुळे देशाला घराणेशाही आणि जातीवादाच्या राजकारणातून मुक्तता मिळेल. यातून नवीन विचारांचेही सिंचन होईल असे मोदी म्हणाले.
-
वन नेशन वन इलेक्शनसाठी पुढाकार घ्या
आज देशात प्रत्येक कामाला निवडणुकीचाच रंग दिला जात आहे. सर्व राजकीय पक्षांनी आपली मतं मांडली आहेत. देशाला आता वन नेशन वन इलेक्शनसाठी पुढे यावे लागणार आहे. मी सर्व राजकीय पक्षांना विनंती करतो की भारताच्या प्रगतीसाठी वन नेशन वन इलेक्शनचे स्वप्न साकार करण्यासाठी पुढे या.
-
देशाला कम्यूनल नाही सेक्यूलर सिव्हिल कोडची गरज
सर्वोच्च न्यायालयाने अनेकदा युनिफॉर्म सिव्हिल कोडबाबत चर्चा केली आहे. देशातील बहुतांश नागरिकांना वाटतं की सिव्हिल कोड सांप्रदायिक आहे. यात सत्यता आहे. संविधान निर्मात्यांचं जे स्वप्न होतं ते पूर्ण करण्याची आमची जबाबदारी आहे. देशातील प्रत्येक घटकाने यावर चर्चा करण्याची गरज आहे. धर्माच्या आधारावर गट तयार करणारे कायद्यांचे समाजात स्थान नाही. आता देशात सेक्यूलर सिव्हिल कोडची गरज आहे. कम्यूनल सिव्हिल कोडमध्ये 75 वर्षे निघून गेली आहे. आता आपल्याला सेक्यूलर सिव्हिल कोडकडे मार्गक्रमण करावे लागणार आहे.
-
बांग्लादेशातील हिंदूंचं संरक्षण व्हावं
पंतप्रधान मोदींनी आपल्या भाषणात बांग्लादेशातील हिंसाचाराचा मुद्दा उपस्थित केला. बांग्लादेशात जे काही घडलंय ते पाहून शेजारी देश म्हणून दुःख होणं सहाजिक आहे. तेथील परिस्थिती लवकरच पूर्वपदावर येईल अशी अपेक्षा आहे. बांग्लादेशातील अल्पसंख्यक हिंदू धर्मियांचे संरक्षण व्हावे अशी भारतीयांची मागणी आहे. शेजारी देशात शांतता प्रस्थापित व्हावी अशी आमची इच्छा असल्याचे मोदी म्हणाले.
-
2036 मध्ये भारतात होणार ऑलिम्पिक स्पर्धा
आज येथे अनेक युवा खेळाडू उपस्थित आहेत ज्यांनी पॅरिस ऑलिम्पिकमध्ये भारताचं नाव मोठं केलं आहे. मी त्यांना शुभेच्छा देतो. आगामी काळात भारताचे एक पथक पॅरिसला जाणार आहे. जी 20 परिषदेचे आयोजन भारतात झाले. अनेक शहरांत दोनशे पेक्षा जास्त कार्यक्रम आयोजित करण्यात आले होते. आता आमचं स्वप्न आहे की 2036 मध्ये ऑलम्पक स्पर्धा भारतात व्हाव्यात. यासाठी तयारीस सुरूवात करण्यात आली आहे.
-
पॅरिस कराराची उद्दीष्टे करणारा एकमेव देश भारत
पीएम मोदी म्हणाले पॅरिस करारांतर्गत जी उद्दीष्टे निश्चित करण्यात आली होती. ती पूर्ण करणारा जी 20 समूहातील देशांपैकी एकच देश आहे तो म्हणजे भारत. 2030 पर्यंत रेल्वेला नेट झिरो एमिशन करण्याचे उद्दीष्ट घेऊन वाटचाल सुरू केली आहे. इलेक्ट्रिक वाहनांची मागणी वेगाने वाढत चालली आहे. पीएम सूर्य योजनेमुळे वाहने चार्ज करणे आणखी सोपे झाले आहे.
-
डिफेन्स मॅन्यूफॅक्चरिंग हब भारताची नवी ओळख
याआधी संरक्षण बजेटमधील पैसे बाहेरून हत्यारे खरेदी करण्यातच संपून जात होते. आज मात्र आम्ही देशाला संरक्षण क्षेत्रात आत्मनिर्भर बनवले आहे. संरक्षण उपकरणांच्या निर्मितीत भारताची वेगळी ओळख निर्माण झाली आहे. भारत डिफेन्स मॅन्युफॅक्चरिंग हब म्हणून ओळखला जाऊ लागल्याचे पंतप्रधान नरेंद्र मोदी यांनी सांगितले.
-
देशाच्या संरक्षणासह अंतराळातही महिलांचा दबदबा
महिला आधारीत विकासाच्या मॉडेलवर काम करण्यात आले आहे. इनोवेशन पासून प्रत्येक क्षेत्रात महिला पुढे येत आहेत. महिला फक्त सहभागीच होत नाहीत तर नेतृत्वही करत आहेत. सेना, नौसेना आणि स्पेस क्षेत्रात महिलांनी स्वतःला सिद्ध केले आहे. सरकारने महिलांच्या सक्षमीकरणासाठी अनेक योजना राबवल्या आहेत. आगामी काळात आणखीही योजना राबविण्यात येणार असल्याचे पंतप्रधान नरेंद्र मोदी यांनी सांगितले.
-
रिसर्च इनोवेशनसाठी एक कोटींची तरतूद
आता विज्ञान तंत्रज्ञानावर भर देण्याची गरज आहे. चांद्रयानाच्या यशस्वी मोहिमेनंतर विद्यार्थी या क्षेत्राकडे आकर्षित होत आहेत. आता या विद्यार्थ्यांना योग्य दिशा देण्यासाठी संस्थांनी पुढे येण्याची गरज आहे. रिसर्चसाठी सरकारने आणखी मदत करण्याचा निश्चय केला आहे. नॅशनल रिसर्च फाउंडेशन सारखी व्यवस्था तयार केली आहे. यासाठी बजेटमध्ये एक कोटी रुपये रिसर्च अँड इनोवेशनसाठी दिले आहेत, असे नरेंद्र मोदी म्हणाले.
