IPL 2023: प्लेऑफची लढत मनोरंजक, सर्व संघ शर्यतीत, जाणून घ्या समीकरण

IPL 2023: सध्या इंडियन प्रीमियर लीग (IPL) 2023 रोमांचक स्थितीत आहे. चालू हंगामात रविवारपर्यंत (7 मे) 52 सामने झाले असून सर्व दहा संघांनी किमान 10 सामने खेळले आहेत. आता ग्रुप स्टेजचे फक्त 18 सामने बाकी आहेत आणि सर्व दहा संघ अजूनही प्लेऑफच्या शर्यतीत आहेत. हार्दिक पांड्याच्या नेतृत्वाखालील गुजरात टायटन्सची (जीटी) स्थिती अतिशय मजबूत आहे आणि ती प्लेऑफमध्ये पोहोचण्याच्या जवळ आहे.

गुजरातनंतर चेन्नई सुपर किंग्जचा संघ 13 गुणांसह दुसऱ्या स्थानावर आहे. त्यानंतर लखनौ सुपर जायंट्स 11 गुणांसह तिसऱ्या क्रमांकावर आहे. यानंतर, पुढील चार संघांचे 10-10 गुण आहेत आणि शेवटच्या तीन संघांचे प्रत्येकी आठ गुण आहेत. यावरून प्लेऑफची शर्यत खूपच रोमांचक झाल्याचे स्पष्ट होते.

1. गुजरात टायटन्स: गतविजेत्या गुजरात टायटन्सची कामगिरी उत्कृष्ट राहिली आणि ते प्लेऑफमध्ये स्थान मिळवण्याच्या जवळ आले आहेत. लखनौ सुपर जायंट्सवर 56 धावांनी विजय मिळवल्यानंतर गुजरातचे 11 सामन्यांत 16 गुण आहेत. गुजरातला सलग दुसऱ्यांदा प्लेऑफमध्ये स्थान पक्के करण्यासाठी उर्वरित तीन सामन्यांपैकी फक्त एक सामना जिंकणे आवश्यक आहे.

2. चेन्नई सुपर किंग्स: मुंबई इंडियन्सवर विजय मिळवल्यानंतर CSK आता दुसऱ्या स्थानावर आहे. सीएसकेचे 11 सामन्यांतून 13 गुण आहेत आणि प्लेऑफसाठी पात्र होण्यासाठी तीनपैकी दोन सामने जिंकणे आवश्यक आहे. अशा स्थितीत सीएसके 17 गुणांसह प्लेऑफमध्ये पोहोचू शकते, परंतु यासाठी सीएसकेला आपला नेट-रनरेट सुधारावा लागेल.

3. लखनौ सुपरजायंट्स: गुजरात टायटन्सविरुद्ध पराभव पत्करावा लागला असला तरी, लखनौ सुपरजायंट्स संघ 11 सामन्यांत 11 गुणांसह तिसऱ्या स्थानावर आहे. लखनौचे अजून 3 सामने बाकी आहेत, जे जिंकून ते प्लेऑफमध्ये स्थान पक्के करण्याचा प्रयत्न करेल.

4. राजस्थान रॉयल्स: 2008 च्या चॅम्पियन राजस्थान रॉयल्सचे 11 सामन्यांत 10 गुण आहेत आणि ते स्पर्धेतून बाद होण्याचा धोका आहे. राजस्थान रॉयल्सला आता प्लेऑफमध्ये स्थान मिळवण्यासाठी त्यांचे उर्वरित तीनही सामने जिंकणे आवश्यक आहे. यासोबतच राजस्थानलाही इतर निकाल आपल्या बाजूने लागतील अशी आशा बाळगावी लागेल.

5. रॉयल चॅलेंजर्स बंगलोर: आरसीबीला त्यांच्या शेवटच्या सामन्यात दिल्ली कॅपिटल्सकडून 7 गडी राखून पराभव स्वीकारावा लागला. RCB आता 10 सामन्यांत 10 गुणांसह 5व्या स्थानावर आहे. RCB साठी चिंतेची बाब म्हणजे त्याचा नेट-रनरेट जो सध्या उणे (-0.209) वर आहे. आरसीबी त्यांच्या उर्वरित चार सामन्यांमध्ये विजय मिळवून प्लेऑफमध्ये सहज पोहोचू शकतो. उर्वरित निकाल आरसीबीच्या बाजूने लागल्यास तीन सामने जिंकूनही ते प्लेऑफमध्ये प्रवेश करू शकतात.

आशिया कपमधून पाकिस्तान आऊट?; भारताचं पारडं जड

6. मुंबई इंडियन्स: 10 सामन्यांत 10 गुणांसह, पाच वेळा चॅम्पियन मुंबई इंडियन्सचा संघ सहाव्या स्थानावर आहे. प्लेऑफमध्ये सहज पोहोचण्यासाठी मुंबई इंडियन्सला त्यांचे उर्वरित चारही सामने जिंकणे आवश्यक आहे. मुंबई 16 गुणांसह प्लेऑफमध्येही स्थान मिळवू शकते, परंतु यासाठी त्यांना इतर संघांच्या निकालावर अवलंबून राहावे लागेल.

7. पंजाब किंग्स: मुंबई इंडियन्सविरुद्धच्या शेवटच्या सामन्यात पराभवाचा सामना करणारा पंजाब किंग्जचा संघ गुणतालिकेत सातव्या स्थानावर आहे. पंजाबचे 10 सामन्यांत 10 गुण आहेत, ते उर्वरित संघांपेक्षा फारसे मागे नाही. 18 चा जादुई आकडा गाठण्यासाठी पंजाबला चारही सामने जिंकावे लागतील.

8. कोलकाता नाईट रायडर्स: सनरायझर्स हैदराबादविरुद्धचा शेवटचा सामना जिंकल्यानंतर केकेआर प्लेऑफच्या शर्यतीत कायम आहे. KKR सध्या 10 सामन्यांतून 8 गुणांसह 8 व्या स्थानावर आहे, KKR ला 16 गुण मिळविण्यासाठी त्यांचे उर्वरित चार सामने जिंकणे आवश्यक आहे. तथापि, 4 संघांना 18-18 गुण मिळाले तर 16 गुणही पुरेसे ठरणार नाहीत. आता हे चारही सामने केकेआरसाठी करा किंवा मरोचे आहेत. आणखी एक पराभव त्यांना अधिकृतपणे प्लेऑफच्या शर्यतीतून बाहेर काढेल.

9. सनरायझर्स हैदराबाद: राजस्थान रॉयल्सवरील विजयामुळे SRH प्लेऑफच्या शर्यतीत कायम आहे. सनरायझर्सचे 10 सामन्यांत 8 गुण झाले असून ते सध्या 9व्या स्थानावर आहेत. उर्वरित चार सामने जिंकल्यास एसआरएचचे 16 गुण होतील. इतर निकाल त्यांच्या बाजूने राहिले तर सनरायझर्स संघ 16 गुणांसह प्लेऑफमध्ये जाऊ शकतो.

10. दिल्ली कॅपिटल्स: गेल्या पाच सामन्यांमध्ये चार विजयांसह दिल्ली कॅपिटल्स प्लेऑफच्या शर्यतीत आहेत. दिल्लीचे 10 सामन्यांत 8 गुण झाले असून ते शेवटच्या स्थानावर आहे. दिल्लीला प्लेऑफमध्ये जाण्याची शक्यता जिवंत ठेवण्यासाठी उर्वरित चार सामने जिंकावे लागतील. अशा स्थितीत त्याला 16 गुण मिळतील. त्यानंतर उर्वरित निकाल दिल्लीच्या बाजूने राहिल्यास त्याचा प्लेऑफमध्ये प्रवेश होईल.