‘६० वर्षांत काहीच केलं नाही’ म्हणणाऱ्या भाजपचा काँग्रेसच्या राजकीय घराण्यांना रेड कार्पेट का?

Old Congress Leaders Get Honor In BJP: भाजप नेहमीच काँग्रेसवर आणि त्यांच्या नेत्यांवर टीका करत आली आहे. ‘६० वर्षात काँग्रेसनं काहीच केलं नाही’, ‘घराणेशाही’, ‘भ्रष्टाचार’ अशी वाक्यं भाजपच्या नेत्यांच्या भाषणांत हमखास ऐकायला मिळतात. पण प्रत्यक्षात भाजपने गेल्या काही वर्षांत काँग्रेस-राष्ट्रवादीचे मातब्बर नेते आणि त्यांचे नातेवाईक आपल्या पक्षात सामावून घेतले आहेत. हे पाहता भाजपची ‘घराणेशाही’विरोधी भूमिका केवळ बोलाचीच कढी आहे, असं म्हणावं लागेल.

काँग्रेसवर नेहमी घराणेशाहीचा आरोप करणाऱ्या भाजपनं आता स्वतःच ‘घराणेशाही’ची वाट धरली आहे का, हा मोठा प्रश्न निर्माण झाला आहे. भाजपच्या नेत्यांनी वारंवार ‘घराणेशाही नको’ असं सांगितलं, पंतप्रधान नरेंद्र मोदींनीही अनेकदा भाषणात “राजकीय घराण्यांपासून मुक्ती मिळवली पाहिजे” असं ठणकावून सांगितलं होतं. पण प्रत्यक्षात भाजपने महाराष्ट्रातील विधानसभा निवडणुकीच्या पहिल्याच यादीत काँग्रेससह इतर राजकीय घराण्यांतील अनेकांना तिकीट दिलं होतं.

काँग्रेसची घराणेशाही भाजपने सर्रास स्वीकारली?

माजी मुख्यमंत्री वसंतदादा पाटील यांच्या नातसून जयश्री पाटील यांनी अलीकडेच भाजपमध्ये प्रवेश केला. भाजप नेत्यांनी वसंतदादांच्या नेतृत्वाचं कौतुक केलं, पण हेच नेते पूर्वी काँग्रेससह त्यांच्या सत्ताकाळावर टीका करत होते. माजी मुख्यमंत्री वसंतराव नाईक यांचे नातू निलय नाईक हे भाजपचे आमदार आहेत. नाईक घराण्याचा वारसा भाजपने मोठ्या अभिमानाने स्वीकारला आहे. सोलापूरच्या मोहीते-पाटील घराण्यातील नेते भाजपमध्ये सामील झाले आहेत. हेच घराणे पूर्वी राष्ट्रवादी-काँग्रेसच्या राजकारणाचा केंद्रबिंदू होतं. माजी मुख्यमंत्री शिवाजीराव पाटील निलंगेकर यांचे नातेवाईक भाजपमध्ये आहेत. चाकूरकर, नाईक-निंबाळकर, छत्रपती शिवाजी महाराजांचे वंशज उदयनराजे भोसले यांनीही भाजपमध्ये प्रवेश केला. हर्षवर्धन पाटील, चाकूरकर हे नेतेही भाजपमध्ये आहेत किंवा काही काळ होते. अशोक चव्हाण काँग्रेसचे माजी मुख्यमंत्री, आणि नारायण राणे या दोघांनाही भाजपनं पक्षात घेतलं आणि त्यांच्या नेतृत्वाची प्रशंसा केली.

पंतप्रधान मोदींनी स्वतः शरद पवार यांना ‘राजकीय गुरु’ म्हटलं होतं, हे विसरता येणार नाही. भाजपने ज्या घराण्यांवर, नेत्यांवर, त्यांच्या कार्यशैलीवर, आणि ‘घराणेशाही’वर सातत्याने टीका केली, तेच नेते आणि नेत्यांचे नातेवाईक आज पक्षात घेतले. मग भाजपने नेमकं काय साधलं? ‘घराणेशाही’ला विरोध हा केवळ निवडणुकीपुरता मुद्दा होता का? की सत्ता मिळवण्यासाठी कोणतीही तडजोड चालते, अशी भाजपची भूमिका आहे?

या सगळ्या पार्श्वभूमीवर भाजपची ‘घराणेशाहीविरोधी’ भूमिका फक्त बोलाचीच कढी वाटते. एकीकडे काँग्रेसवर टीका, दुसरीकडे त्याच पक्षाच्या नेत्यांना आपल्या पक्षात मानाचं स्थान ही भाजपची दुटप्पी भूमिका आता उघडी पडली आहे. म्हणजे काय, तर काँग्रेसची घराणेशाही भाजपने सर्रास स्वीकारली आहे. काँग्रेसवर टीका करताना भाजपने स्वतःच ‘घराणेशाही’चा मार्ग अवलंबला आहे. “दाखवायचे दात वेगळे, खायचे दात वेगळे” अशी टीका काँग्रेसने केली, ती या पार्श्वभूमीवर योग्यच वाटते. राजकीय घराणेशाहीवर टीका करणाऱ्या भाजपने, निवडणूक जिंकण्यासाठी आणि सत्ता मिळवण्यासाठी, काँग्रेसच्या घराणेशाहीला पूर्णपणे स्वीकारलं आहे, हे आता उघड झालं आहे.

संबंधित बातम्या