पुन्हा निर्णय बदलला! सरन्यायाधीशांच्या आई कमलताई गवई अमरावतीमध्ये ‘संघ’ कार्यक्रमाला जाणार

कार्यक्रमाला माजी राज्यपाल दिवंगत रा.सू. गवई यांच्या पत्नी आणि सरन्यायाधीश भूषण गवई यांच्या आई कमलताई गवई यांना निमंत्रण देण्यात आले आहे.

माजी राज्यपाल दिवंगत रा.सू. गवई यांच्या पत्नी आणि सरन्यायाधीश भूषण गवई (Gavai) यांच्या आई कमलताई गवई सध्या मोठ्या प्रमाणात चर्चेत आहेत. कारण आहे राष्ट्रीय स्वयंसेवक संघ. संघाकचा अमरावती महानगरच्या वतीने ५ ऑक्टोबरला विजयादशमी उत्सवाचं आयोजन करण्यात आलं आहे. या कार्यक्रमाला कमलाताई यांना निमंत्रण देण्यात आलं आहे. त्यावरून त्या जाणार की नाही असा वाद निर्माण झाला आहे. कालच त्यांनी जाणार नसल्याचं पत्र प्रसिद्ध केलं. मात्र, आज त्या जाणार असल्याची माहिती समोर आली आहे.

कमलताईंनी संघाच्या कार्यक्रमाला येण्यास कधीच होकार दिलेला नाही, हे संघाचे षडयंत्र आहे, आपण पक्के आंबेडकरवादी आहोत, असे स्पष्टीकरण दिल्याचे पत्र समाज माध्यमांवर प्रसारित झाल्याने नवीन वाद निर्माण झाला आहे. यावर रिपब्लिकन पक्षाचे नेते आणि कमलताई गवई यांचे चिरंजीव डॉ. राजेंद्र गवई यांनी एक व्हिडिओ प्रसारित करून कमलताई या संघाच्या कार्यक्रमाला नक्की जाणार त्यांनी स्वतःही निमंत्रण स्वीकारलेले आहे अशी माहिती दिली आहे. त्यामुळे नक्की काय चाललं आहे यावरून जोरदार चर्चा सुरू आहे.

RSS चे षडयंत्र; मी आंबेडकरी, विजयादशमी सोहळ्याला उपस्थित राहणार नाही; कमलताई गवईंचे स्पष्टीकरण

राष्ट्रीय स्वयंसेवक संघाचा विजयादशमी उत्सव नागपूरमध्ये २ ऑक्टोबरला साजरा होणार आहे. या कार्यक्रमाला माजी राष्ट्रपती रामनाथ कोविंद यांची प्रमुख उपस्थिती राहणार आहे. तर ५ ऑक्टोबरच्या अमरावतीमधील कार्यक्रमाला कमलताई गवई मुख्य अतिथी म्हणून उपस्थित राहणार असल्याच्या निमंत्रण पत्रिका शुक्रवारी सर्वत्र वाटप झाल्या आहेत.

माजी राज्यपाल दिवंगत रा.सू. गवई हे डॉ. बाबासाहेब आंबेडकर स्मारक समिती दीक्षाभूमीचे अध्यक्ष होते. दीक्षाभूमीच्या उभारणीत त्यांचा मोलाचा वाटा होता. सध्या त्यांचे चिरंजीव डॉ. राजेंद्र गवई हे स्मारक समितीचे सदस्य आहेत. या परिवारातील कमलताई गवई संघाच्या शताब्दी सोहळ्याला उपस्थित राहणार असल्याने सर्वत्र चर्चेचा विषय झाला. त्यानंतर काल कमलताईंचे स्वलिखित पत्र प्रसार माध्यमांवर आले. यात त्यांनी संघाच्या विजयादशमी सोहळ्याला आपण उपस्थित राहणार असल्याची बातमी धादांत खोटी आहे, असे स्पष्टीकरण दिले आहे.

संबंधित बातम्या