ASI टीम वाराणसीला पोहोचली, कडेकोट बंदोबस्तात ज्ञानवापी मशीद संकुलाचे सर्वेक्षण सुरु…
- Written By: Rahul shelke Published:
भारतीय पुरातत्व सर्वेक्षण (ASI) चे पथक रविवारी संध्याकाळी उशिरा वाराणसीला पोहोचले. या पथकाने सोमवारी सकाळी 7 वाजल्यापासून ज्ञानवापी मशीद परिसराचे सर्वेक्षण सुरू केले आहे. यामध्ये मशिदीचा वजूखाना वगळता उर्वरित जागेचे शास्त्रोक्त सर्वेक्षण केले जाणार आहे. (Varanasi Gyanvapi Mosque Case Asi Scientific Survey On July 24 Except Wazukhana Varanasi Court)
काशी विश्वनाथ मंदिराजवळील मां शृंगार गौरी-ज्ञानवापी मशीद प्रकरणातील हिंदू बाजूची मागणी मान्य करून, शुक्रवारी उत्तर प्रदेशातील वाराणसी येथील न्यायालयाने वाजुखाना वगळता संपूर्ण ज्ञानवापी संकुलाचे पुरातत्व आणि वैज्ञानिक सर्वेक्षण करण्यास परवानगी दिली.
यासाठी एएसआयची टीम रविवारी उत्तर प्रदेशातील लखनऊला पोहोचली आणि वाराणसीच्या आयुक्तांचीही भेट घेतली. हिंदू पक्षाचे सर्व वकील पोलिस आयुक्तांच्या निवासस्थानी पोहोचले असून, रात्री उशिरापर्यंत त्यांची बैठक सुरू होती. हिंदू पक्षाचे वकील सुभाष नंदन यांनी सांगितले की, ज्ञानवापी मशिदीच्या वैज्ञानिक सर्वेक्षणाचे काम श्रावणाच्या तिसऱ्या सोमवारी सुरू होऊ शकते.
वाराणसीचे डीएम म्हणाले
या संदर्भात वाराणसीचे डीएम एस राजलिंगम म्हणाले, ‘आम्हाला एएसआयकडून माहिती मिळाली आहे की उद्यापासून सर्वेक्षण सुरू होणार आहे… आम्हाला अद्याप वेळेबद्दल सांगण्यात आलेले नाही… सुरक्षेच्या दृष्टीने आम्ही सर्व आवश्यक तयारी करत आहोत.’
एएसआयला सर्वेक्षण केल्यानंतर 4 ऑगस्ट 2023 रोजी वाराणसी न्यायालयात अहवाल सादर करण्यास सांगितले आहे. न्यायालयातील या प्रकरणाची पुढील सुनावणीही याच तारखेला होणार आहे. ज्ञानवापी मशिदीत सापडलेल्या ‘शिवलिंगा’चे वय निश्चित करण्यासाठी कार्बन डेटिंगसह वैज्ञानिक सर्वेक्षणाची मागणी करणाऱ्या याचिकेवर न्यायालयाने हा निकाल दिला होता.
मोदींनी आणि स्मृती इराणींनी मणिपूरला भेट द्यावी; DCW अध्यक्षा स्वाती मालीवाल स्पष्टच बोलल्या…
21 जून रोजी, एके विश्वेश यांच्या न्यायालयाने हिंदू पक्षांच्या एका गटाने मशीद हिंदू मंदिराच्या जागेवर बांधली गेली आहे की नाही हे शोधण्यासाठी वैज्ञानिक सर्वेक्षणाची मागणी करणारी याचिका मान्य केली. तथापि, हिंदू पक्षांनी जेथे ‘शिवलिंग’ असल्याचा दावा केला होता त्या बॅरिकेडेड वजूखाना’चा समावेश सर्वेक्षणात केला जाणार नाही.
विशेष म्हणजे, ऑगस्ट 2021 मध्ये, मशिदीच्या आवारात असलेल्या माँ शृंगार गौरी स्थळावर नियमित पूजेचा अधिकार मिळावा या मागणीसाठी पाच महिलांनी स्थानिक न्यायालयात याचिका दाखल केली होती. एप्रिल 2022 मध्ये, दिवाणी न्यायाधीश (वरिष्ठ विभाग) यांच्या न्यायालयाने ज्ञानवापी मशीद संकुलाचे सर्वेक्षण करण्याचे आदेश दिले. मुस्लिमांच्या विरोधानंतर मे 2022 मध्ये सर्वेक्षण पूर्ण झाले. दरम्यान, हिंदू बाजूने मशिदीच्या आवारात विसर्जनासाठी असलेल्या तलावात ‘शिवलिंग’ सापडल्याचा दावा केला, तर मुस्लिम बाजूने त्याला कारंजे म्हटले.
