कॅराकस मोठ्या स्फोटांनी हादरले; व्हेनेझुएलावर हल्ला; शहरावर लढाऊ विमाने घिरट्या घालताना दिसली

व्हेनेझुएलाची राजधानी कॅराकस येथे कमी उंचीवरून उडणाऱ्या विमानासारख्या आवाजांसह जोरदार स्फोट झाल्याची माहिती.

Venezuela under attack? fighter jets spotted over city : व्हेनेझुएलाची(Venezuela)राजधानी कॅराकस येथे कमी उंचीवरून उडणाऱ्या विमानासारख्या आवाजांसह जोरदार स्फोट झाल्याची माहिती आंतरराष्ट्रीय मीडिया रिपोर्ट्समधून समोर आली आहे. वृत्तसंस्था एएफपीच्या माहितीनुसार, या स्फोटांचे नेमके स्रोत तात्काळ स्पष्ट होऊ शकले नाहीत. विशेष म्हणजे, पहिल्या स्फोटानंतर सुमारे 15 मिनिटांपर्यंत स्फोटांचे आवाज ऐकू येत असल्याचे स्थानिक सूत्रांनी सांगितले. ही घटना अशा वेळी घडली आहे, जेव्हा अमेरिकेचे राष्ट्राध्यक्ष डोनाल्ड ट्रम्प(Donald Trump)यांनी व्हेनेझुएलाविरुद्ध थेट जमिनीवरील लष्करी कारवाईची शक्यता सूचित केली आहे. या पार्श्वभूमीवर अमेरिकेने कॅरिबियन भागात विस्तारित सुरक्षा मोहिमेअंतर्गत नौदलाचे कार्यदल तैनात केल्याचेही समोर आले आहे.

दरम्यान, आठवड्याच्या सुरुवातीला राष्ट्राध्यक्ष ट्रम्प यांनी दावा केला होता की अमेरिकन सैन्याने व्हेनेझुएलातील अंमली पदार्थांच्या तस्करांकडून वापरल्या जाणाऱ्या एका डॉकिंग साइटवर हल्ला करून ती नष्ट केली आहे. मात्र, हे ऑपरेशन नेमके लष्कराने केले की गुप्तचर संस्थांनी, याबाबत त्यांनी स्पष्ट माहिती देण्यास नकार दिला. तसेच हल्ल्याचे अचूक ठिकाण सांगण्याऐवजी ते फक्त “किनाऱ्यालगत” झाले असल्याचे त्यांनी म्हटले. हा दावा सत्य ठरल्यास, व्हेनेझुएलाच्या भूमीवर झालेला हा अमेरिकेचा पहिला ज्ञात जमीन-आधारित हल्ला ठरू शकतो. दुसरीकडे, व्हेनेझुएलाचे राष्ट्राध्यक्ष निकोलस मादुरो यांनी या कथित हल्ल्याची ना पुष्टी केली आहे, ना खंडन. मात्र, गुरुवारी त्यांनी अमेरिकेकडून वाढलेल्या लष्करी दबावानंतर वॉशिंग्टनसोबत सहकार्य करण्यास आपण तयार असल्याचे संकेत दिले.

मी देवेंद्र फडणवीसांना खासगीत नेहमी सांगायचो साहेब, थोडा विचार करा; रवींद्र चव्हाणांच्या वक्तव्याने खळबळ

ट्रम्प प्रशासनाने मादुरो यांच्यावर आंतरराष्ट्रीय अंमली पदार्थ तस्करी नेटवर्कचे नेतृत्व केल्याचा गंभीर आरोप केला आहे. अमेरिकेच्या मते, ही संपूर्ण कारवाई अंमली पदार्थांच्या तस्करीविरोधातील व्यापक मोहिमेचा भाग आहे. मात्र, मादुरो यांनी हे सर्व आरोप फेटाळून लावले असून, व्हेनेझुएलाकडे असलेल्या प्रचंड तेलसाठ्यांमुळेच अमेरिका आपले सरकार अस्थिर करण्याचा प्रयत्न करत असल्याचा आरोप त्यांनी केला आहे. दरम्यान, वॉशिंग्टनने व्हेनेझुएलावर आर्थिक आणि सामाजिक दबाव वाढवला असून, कडक निर्बंध, व्हेनेझुएलाचे कच्चे तेल वाहून नेणाऱ्या टँकरची जप्ती आणि देशाच्या हवाई क्षेत्राचे अनौपचारिक बंद असे वर्णन करण्यात येणारे उपाय यामध्ये समाविष्ट आहेत.

गेल्या काही आठवड्यांपासून ट्रम्प यांनी या भागात सक्रिय असलेल्या ड्रग कार्टेल्सविरोधात लवकरच निर्णायक कारवाई केली जाईल, असा इशारा दिला होता. सोमवारी झालेल्या कथित ऑपरेशनकडे त्या रणनीतीची प्रत्यक्ष अंमलबजावणी म्हणून पाहिले जात आहे. सप्टेंबरपासून अमेरिकन सैन्याने कॅरिबियन समुद्र आणि पूर्व पॅसिफिक महासागरात अनेक जहाजांविरुद्ध कारवाई केली असून, ही जहाजे अंमली पदार्थांच्या तस्करीशी संबंधित असल्याचा दावा अमेरिकेने केला आहे. मात्र, या दाव्यांना पुष्टी देणारे ठोस पुरावे अद्याप सार्वजनिक करण्यात आलेले नाहीत. त्यामुळे या हल्ल्यांच्या कायदेशीरतेवर आंतरराष्ट्रीय स्तरावर प्रश्नचिन्ह उपस्थित होत आहेत. अमेरिकन सैन्याने जाहीर केलेल्या आकडेवारीनुसार, या मोहिमेअंतर्गत किमान 30 सागरी ऑपरेशन करण्यात आली असून, त्यामध्ये किमान 107 जणांचा मृत्यू झाल्याची माहिती आहे.

संबंधित बातम्या