जैन बोर्डिंग जमीन प्रकरण! मुरलीधर मोहोळांचा राजीनामा घ्या; उद्यापासून धंगेकरांचं बेमुदत धरणे आंदोलन…

पुण्यातील जैन बोर्डिंग व्यवहार प्रकरणी केंद्रीय राज्यमंत्री मुरलीधर मोहोळ यांच्या राजीनाम्याच्या मागणीसाठी माजी आमदार रविंद्र धंगेकर उद्यापासून आंदोलन करणार आहेत.

Ravindra Dhangekar : पुण्यातील जैन बोर्डिंग जमीन व्यवहार प्रकरणी केंद्रीय राज्यमंत्री मुरलीधर मोहोळ (Murlidhar Mohol) यांचा राजीनामा घ्यावा, आणि जैन बोर्डिंग व्यवहार रद्द होण्याच्या मागणीसाठी माजी आमदार, शिंदे गटाचे नेते रविंद्र धंगेकरांनी (Ravindra Dhangekar) बेमुदत धरणे आंदोलनाचं हत्यार उपसलंय. उद्यापासून दि. 27 ऑक्टोबरपासून धंगेकर आंदोलन करणार आहेत. त्यामुळे आता जैन बोर्डिंग जमीन व्यवहार प्रकरणाला वेगळं वळण लागणार असल्याचं चित्र पाहायला मिळत आहे. एकीकडे धंगेकरांचे आरोप तर दुसरीकडे मंत्री मोहोळ यांनी काल जैन मुनींची भेट घेतली आहे. आंदोलनाबाबत धंगेकर यांनी सोशल मीडियावर पोस्ट शेअर करत माहिती दिली आहे.

तमाम पुणेकरांना मी एका गोष्टीची माहिती देऊ इच्छितो, आज आपल्या सर्वांच्या वतीने मी जैन बोर्डिंगचा व्यवहार रद्द व्हावा व प्रकरणाची कठोर चौकशी व्हावी, यासाठी देशाचे पंतप्रधान माननीय नरेंद्र मोदी यांना पत्राद्वारे विनंती करत आहे.
तसेच २७ ऑक्टोबर २०२५ पासून हा व्यवहार रद्द होईपर्यंत… pic.twitter.com/VtUIDSPPrr

— Ravindra Dhangekar Official (@DhangekarRavii) October 25, 2025

धंगेकर ट्विटमध्ये म्हणाले, “तमाम पुणेकरांना मी एका गोष्टीची माहिती देऊ इच्छितो, आज आपल्या सर्वांच्या वतीने मी जैन बोर्डिंगचा व्यवहार रद्द व्हावा व प्रकरणाची कठोर चौकशी व्हावी, यासाठी देशाचे पंतप्रधान माननीय नरेंद्र मोदी यांना पत्राद्वारे विनंती करत आहे. तसेच २७ ऑक्टोबर २०२५ पासून हा व्यवहार रद्द होईपर्यंत मी तमाम पुणेकरांसह जैन बोर्डींग येथे बेमुदत धरणे आंदोलनास बसत आहे. आजपर्यंतच्या गेल्या अठरा दिवसांच्या संपूर्ण संघर्षात माझ्यासह अनेक लोकांनी, अनेक वेळा या गोष्टीचे प्रत्यक्ष प्रत्यक्ष पुरावे दिले की, व्यवहारातील सर्वच व्यक्ती व संस्था या श्री.मुरलीधर मोहोळ यांच्या संबंधित आहेत. आज मी या पत्र्यामध्ये देखील आपल्या सर्वांच्या माहितीसाठी या संपूर्ण घटनेचा घटनाक्रम देत आहेत.

जैन बोर्डिंग चा व्यवहार रद्द होण्याबरोबरच समाजातील मंदिरे व देवस्थानच्या जागा हडप करणाऱ्या टोळीवर कठोर कारवाई व्हावी, यासाठी या प्रकरणाची निपक्ष:पाती चौकशी होणे गरजेचे आहे. ही मी निपक्ष:पाती चौकशी तेव्हा शक्य आहे जेव्हा सदर प्रकरणातील मुरलीधर मोहोळ हे आपल्या पदाचा राजीनामा देतील. कारण त्यांच्या केंद्रीय मंत्रीपदाच्या प्रभावाखालीच हा इतका मोठा गैरव्यवहार घडला आहे. त्यामुळे ही चौकशी होत असताना देखील त्यांनी मंत्रीपदावर राहणे योग्य नाही.
त्यामुळे मी आज मुरलीधर मोहोळ यांच्या मंत्रीपदाच्या राजीनाम्याची मागणी करत आहे.

सर्वोच्च न्यायालयाचा मोठा निर्णय! मुलं रद्द करू शकणार पालकांनी बालपणीच परस्पर विकलेल्या संपत्तीचे सौदे

आज माननीय पंतप्रधानांसह ,देशाचे गृह तथा सहकारमंत्री, राज्याचे सन्माननीय मुख्यमंत्री, माननीय उपमुख्यमंत्री महोदय यांना देखील आपण या पत्राच्या प्रती पाठवत आहोत.त्यांनी या प्रकरणात लक्ष घालून तातडीने हा व्यवहार आपल्या विशेष अधिकारातून रद्द करावा व या प्रकरणाची कठोर चौकशी होईपर्यंत श्री. मुरलीधर मोहोळ यांचा राज्यमंत्री पदाचा राजीनामा घ्यावा ,अशी मागणी मी करत असल्याचं धंगेकरांनी ट्विटमध्ये म्हटलंय.

पुण्यातील जैन बोर्डिंग घोटाळा प्रकरणात पुण्याचे खासदार आणि केंद्रीय राज्यमंत्री मुरलीधर मोहोळ यांच्यावर सातत्यानं आरोप होत आहेत, शिवसेना शिंदे गटाचे नेते रवींद्र धंगेकर यांनी या प्रकरणात आक्रमक भूमिका घेतली असून, त्यांच्याकडून वारंवार मुरलीधर मोहोळ यांच्यावर आरोप करण्यात येत आहेत. अशातच आज खासदार मुरलीधर मोहोळ पहिल्यांदाच जैन बोर्डिंग या ठिकाणी गेले होते. जैनमुनी यांचा जो काही जागेचा मुद्दा आहे तो बाजूला राहून माझ्यावर फार वाईट पद्धतीने आरोप झाले. परंतु, जैनमुनी किंवा त्यांच्या संबंधित लोकांनी माझं कधीही नाव घेतलं नाही. बाकी लोकांनी मात्र, आपली राजकीय पोळी भाजून घेण्यासाठी हे राजकारण करत आहेत. परंतु, जैनमुनींनी मला बोलावलं होत त्यामुळे मी गेलो. त्यांनी माझ्याकडून त्यांना सहकार्य व्हाव ही अपेक्षा व्यक्त केली. मी त्यांना आश्वस्त केलं आहे की त्यांना मी सहकार्य करेल असं आश्वासन दिलं असल्याचं मोहोळ यांनी स्पष्ट केलंय.

महापौर असताना पांढऱ्या रंगाची इनोव्हा क्रिस्टा अन्..,; धंगेकरांचा मोहोळांवर नवा बॉम्ब…

दरम्यान, या व्यवहार प्रकरणी मुरलीधर मोहोळ यांनी आपल्यावरील आरोप फेटाळले असतानाही धंगेकर आंदोलनाला बसणार आहेत. एवढचं नाही तर मोहोळ यांनी जैन मुनींची भेट घेऊन सहकार्य करणार असल्याचं सांगितलं आहे. त्यामुळे आता या रविंद्र धंगेकर आंदोलनाला बसल्यानंतर हे प्रकरण कोणत्या दिशेला जाणार हे पाहणं महत्वाचं ठरणार आहे.

संबंधित बातम्या