राज्यात पुन्हा पावसाची एन्ट्री; अनेक जिल्ह्यांत विजांच्या कडकडाटासह पावसाचा इशारा

मुंबईसह कोकण, मध्य महाराष्ट्र आणि मराठवाड्यात पावसासाठी पोषक हवामान तयार झाल्याने पुढील काही दिवस वातावरणात बदल कायम राहण्याची शक्यता आहे.

Rain returns to the stat : राज्यात गेल्या काही दिवसांपासून तापमानात लक्षणीय वाढ झाली असताना आता पावसाने पुन्हा एकदा हजेरी लावली आहे. कालपासून राज्यातील विविध भागांमध्ये ढगाळ वातावरण निर्माण झाले असून अनेक ठिकाणी हलक्या ते मध्यम स्वरूपाच्या पावसाने नागरिकांना उकाड्यापासून दिलासा दिला आहे. विशेषतः मुंबईसह कोकण, मध्य महाराष्ट्र आणि मराठवाड्यात पावसासाठी पोषक हवामान तयार झाल्याने पुढील काही दिवस वातावरणात बदल कायम राहण्याची शक्यता आहे.

भारतीय हवामान विभागाने दिलेल्या अंदाजानुसार, आज मध्य महाराष्ट्र आणि मराठवाड्यातील काही भागांत विजांच्या कडकडाटासह वादळी पावसाची शक्यता आहे. कोकण, मध्य महाराष्ट्र आणि मराठवाड्यात तुरळक ठिकाणी पावसाच्या सरी कोसळू शकतात. मात्र दुसरीकडे विदर्भातील बहुतांश भागांमध्ये उष्णतेची लाट कायम राहण्याचा अंदाज व्यक्त करण्यात आला असून नागरिकांना अद्यापही उकाड्याचा सामना करावा लागणार आहे.

मुंबईत आज सकाळपासूनच रिमझिम पावसाला सुरुवात झाली आहे. त्यामुळे वातावरणात गारवा निर्माण झाला असून तापमानात काही प्रमाणात घट झाल्याचे जाणवत आहे. मुंबईकरांना उकाड्यापासून दिलासा मिळाला असला तरी दिवसभर ढगाळ वातावरण आणि अधूनमधून हलक्या पावसाची शक्यता कायम आहे.

दरम्यान, हवामान विभागाने सातारा, सोलापूर आणि धाराशिव जिल्ह्यांसाठी येलो अलर्ट जारी केला आहे. या जिल्ह्यांमध्ये विजांच्या कडकडाटासह ताशी ४० ते ६० किलोमीटर वेगाने वारे वाहण्याची शक्यता असून काही ठिकाणी वादळी पावसाचा इशारा देण्यात आला आहे. त्यामुळे नागरिकांनी तसेच शेतकऱ्यांनी आवश्यक ती खबरदारी घेण्याचे आवाहन करण्यात आले आहे.

गुटखा माफियांना धक्का, नागरिकांना नवी ताकद; तुकाराम मुंढेंचे एआय तक्रार पोर्टल सुरू

याशिवाय पालघर, ठाणे, मुंबई, रायगड, रत्नागिरी, नाशिक, अहिल्यानगर, पुणे, सांगली, बीड, लातूर, परभणी, हिंगोली आणि नांदेड या जिल्ह्यांमध्येही विजांच्या कडकडाटासह हलक्या ते मध्यम स्वरूपाच्या पावसाची शक्यता वर्तवण्यात आली आहे. काही भागांमध्ये अचानक वाऱ्याचा वेग वाढण्याची शक्यता असल्याने नागरिकांनी सतर्क राहण्याचा सल्ला देण्यात आला आहे.

पुणेकरांसाठी पुढील चार ते पाच दिवस महत्त्वाचे ठरणार आहेत. पुणे शहर आणि परिसरात आकाश अंशतः ढगाळ राहण्याचा अंदाज असून अधूनमधून हलक्या स्वरूपाच्या पावसाच्या सरी कोसळू शकतात. त्यामुळे तापमानात काही प्रमाणात घट होण्याची शक्यता आहे. गेल्या काही दिवसांपासून जाणवत असलेल्या उकाड्यापासून पुणेकरांना काहीसा दिलासा मिळण्याची शक्यता हवामान विभागाने व्यक्त केली आहे.

हवामानातील या बदलामागे बंगालच्या उपसागरात निर्माण झालेले कमी दाबाचे क्षेत्र महत्त्वाचे कारण मानले जात आहे. या प्रणालीचा प्रभाव देशाच्या पूर्व आणि ईशान्य भागांवर जाणवत असून त्याचा परिणाम महाराष्ट्रातील वातावरणावरही होत आहे. या प्रणालीमुळे वातावरणात आर्द्रतेचे प्रमाण वाढले असून ढगांची निर्मिती वेगाने होत आहे. परिणामी राज्यातील अनेक भागांत पावसासाठी अनुकूल परिस्थिती निर्माण झाली आहे.

तिसऱ्या महायुद्धाची ठिणगी? अमेरिका-इराण संघर्षाने जगाची धडधड वाढवली

हवामान तज्ज्ञांच्या मते, आगामी काही दिवस राज्यातील विविध भागांमध्ये ढगाळ वातावरण कायम राहण्याची शक्यता असून अधूनमधून पावसाच्या सरी कोसळू शकतात. काही ठिकाणी विजांच्या कडकडाटासह वादळी पाऊसही पडण्याची शक्यता नाकारता येत नाही. त्यामुळे नागरिकांनी हवामान खात्याच्या सूचनांकडे लक्ष ठेवावे आणि विशेषतः विजांचा कडकडाट सुरू असताना सुरक्षित ठिकाणी आश्रय घ्यावा, असे आवाहन करण्यात आले आहे.

एकीकडे पावसामुळे राज्यातील अनेक भागांना दिलासा मिळत असला, तरी विदर्भात उष्णतेची लाट कायम राहण्याची शक्यता असल्याने तेथील नागरिकांना अजून काही दिवस कडक उन्हाचा सामना करावा लागू शकतो. अशा परिस्थितीत राज्यात एकाच वेळी पाऊस आणि उष्णतेचा दुहेरी अनुभव पाहायला मिळत आहे.

संबंधित बातम्या